Naduh mynta sdang ka pakhang surok miet “San miet kynthih” 26 & 27 Nailur ka pakhang ophis

Shillong, 22 Nailur:
Ki 10 tylli ki sengbhalang kiba ialam ban iakhih ia ka Inner Line Permit (ILP) ha ka jylla, ki la pynbna ia ka pakhang surok miet kaba san miet kynthih naduh ka sngi Nyngkong haduh sngi Thohdieng.
Ka pakhang surok miet kan long naduh 23 tarik haduh 27 tarik Nailur naduh ka por 8 baje janmiet haduh 5 baje mynstep. La pynbna ruh ia ka pakhang ophis kaban long ha ka sngi Palei bad sngi Thohdieng ha ka 26 bad 27 tarik Nailur.
Ki sengbhalang ki la pynjur ia ka jingiakhih ban pynbor ia ka sorkar ba kan pyntreikam ia ka ILP ha kane ka jylla.
Ia kane ka rai la shim ha ka jingialang jong ki sengbhalang kaba long ha ka miet sngi Saitjain ha jaka bym tip satia.
U Information bad publicity secretary u Bah Eldie N Lyngdoh u la pyntip sha ki lad pathai khubor ha kane ka sngi Saitjain ba nalor ka pakhang surokmiet, la khot ia ka pakhang ophis ruh ha kitei ki sngi.
“Ngi la la rai ban pynjur ia ka jingiakhih ban pynsngew ia ka sorkar kaba leh kuman ban pyntreikam noh ia ka ILP kumba la ai jingmut da ka High Level Committee on Influx (HCLI)” la ong u Bah Eldie.
Haba kyntait ban ym kynran dien, u Bah Eldie u la ong ba ki sengbhalang kin bteng beit ban pynjur ia ka jingiakhih lada ka sorkar kam sngap ia ki jingdawa jongki ban pyntreikam noh ia ka ILP.
“Ka nongrim jong ngi ka long ba ka ILP ka dei ka atiar kaba biang tam ban tehlakam ia ka jingwan tyllep ki briew ba nabar sha ka jylla”. Ki sengbhalang ki la ong ruh ba kim salia ei ei ia ka jingbyrngem ka sorkar ban kem ban pynshitom ia ki.
Halor ka jingbyrngem ban buh ha ka MPDA, u Bah Eldie u la ong, “Sangeh ka jingpyntieng kohtympan ia ngi, ngim salia ei ei. Pyntreikam ia ka ILP kumba la ai jingmut ka komiti”.
Lah ban kdew ba dang shen, ka sorkar MUA-2 ba ialam da ka Congress ka la kyntait ban pyntreikam ia ka ILP ha ka jylla. U Myntri Rangbah ka jylla u Mukul Sangma u la ong ba ka jingialang ka MUA ka la rai ban ym pyntreikam satia ia ka ILP bad kane ka kam ka don ha kti ka Kashari.
Ha kaba iadei bad kane, u nongialam ka FKJGP u la ong, lada u Myntri Rangbah u tip ba ka long kumta, balei u thaw ia ka komiti High Level Committee on Influx (HLCoI).”
Ym dei ki sengbhalang kiba thok hynrei dei u Mukul uba thok ia ki paidbah namar u hukum ban thaw ia ka komiti khlem pyntreikam pat ia ka jingai jingmut jongka.
Ha kajuh ka por, ki sengbhalang ki la ai khublei ia ki paidbah kiba iatreilang ha kine ki jingiakhih jong ki sengbhalang kiba pynlong ia ka jingiakhih ban dawa ia ka jingshngain jong ka jaitbynriew ha ka pateng ban wan bad ka jylla.