Shillong: Ha ka 30 tarik u bnai Naiwieng 2021, ki nongtrei jong ka Shillong Municipal Board ki la pynlong ia ka jingialang bad baroh ki nongtrei kiba don hapoh ka shatri jong ka Shillong Muncipal Employee Association ha kaba iadei bad ka jingshah pynduh tulop ki nongtrei bad da kawei ka sur ki la shim ruh ia ka rai ban sdang iakhih naduh ka 1 tarik u bnai Nohprah 2021 ka ban sdang shwa da ka jingiasoi bad ha ki sngi ki ban sa wan pat kin sa sdang sa ka ka jingsangeh treikam.
Haba kren sha ki lad pathai khubor, u President jong ka Shillong Municipal Employees Association, u Bah S Pyngrope u la iathuh ba ha u 2019 ki nongialam jong ka Association ki la leit sha ka Apex Court bad rah ia ki jingthoh jong ki hynrei ha ka 19 tarik u bnai Lber 2020 ka Apex Court ka la pynbna ba katei ka Association ka la ioh ia ka jingjop jong ka bad ba ki don hok ban ioh ia ka Fifth Pay Commission katkum ka kam kaba ki trei namar ba ki dei ki nongtrei kiba trei baroh 24 kynta.
U Bah S Pyngrope, u la iathuh ba naduh katei ka jingpynbna ba ki la ioh ia ka jingjop ki la shu sngap beit kumto namar ha ka jingbunkam eh ha ka kam jong ki bad ki la shu ngeit beit ba kin sa ioh ia kaei kaba ki dei ban ioh katkum ka hukum jong ka Court hynrei ki khlem ioh satia. U Bah S Pyngrope u la iathuh ba hadien kata ka Association ka la phah da ka shithi sha ka Sorkar halor kane ka jingbym ioh jong ki ia ka Fifth Pay bad na ka liang ka Sorkar ka la pynbna ba kan sa pyntreikam noh ia ka Fifth Pay jong ki nonngtrei Municipal naduh u bnai Naitung 2021 bad ha ki bnai kiba la dep ki la ioh ia kata ka Fifth Pay hynrei hadien ar bnai eiei pat ka Sorkar ka pynmih ia ka hukum ban pynsangeh shwa ia ka tulop jong ki nongtrei Municipal bad hadien kata ka Sorkar ka la siew biang ia kitei ki nongtrei da ka Fourth Pay Commission bad na ka liang ka Association kam lah satia ban pdiang ia kane ka jingleh jong ka Sorkar.
Na ka liang katei ka kynhun ka la ong ba kan nym sangeh ban iakhih katba ka sokar kam lah satia ban pyntreikam da ka Fifth Pay Commission bad ban siew ia ka tulop jong ki nongtrei kaba dang sah jong ki saw bnai kynthih. Shuh shuh ka Association ka la kyrpad ruh ia ki paidbah ba kin iaishah lem bad ban iasnoh kti lem bad ki.
Phi don ban ong eiei?