Shillong: Ka sorkar Meghalaya, ka la shah ban sdang trei kam noh ha ki katto katne ki tnat, naduh mynta ka sngi.
Ka hukum jong ka sorkar ka bynta ha ki ar tylli ki bynta, ha kaba kawei, ka long ia baroh kawei ka Jylla, katba kawei pat ka long na bynta ka Shillong bad ka Mylliem Block, kiba la tip kum ki jaka ba don jingma lane ki hot spot.
U Bah Prestone Tynsong, myntri rangbah ba ar, ka sorkar Jylla, u iathuh ha ki kotkhubor, hynnin ka sngi, ba la shim ia katei ka rai, ha ka jing ia kynduh lang, kaba la khlieh da U Conrad K Sangma, myntri rangbah ka Jylla.
Ha baroh kawei ka Jylla, la shah ban sdang noh ka jingtrei ia ki skhim surok, ki skhim ai um rep, ki jingtei iing bad kiwei pat ki kam jong ka skhim MSME bad sa kiwei de ki tnat trei karkhana, ki ban trei kam naduh ka 24tarik Iaiong 2020. La ong shuh shuh ba kiwei pat ki kam kum ki kam shna bor ding, ki kam shna um, ki kam shna motor, ki misteri, ki lah ban sdang noh ia ki kam jongki naduh mynta ka sngi,nangta sa ki dukan kiba die tiar misteri, kum ka dewbilat, ki tin bad ki kali kiba kit ia kitei ki mar, kin sdang noh ia la ki jong ki kam bad nangta ki dukan die tiar ilektrik, ki dukan shna trok ha ki surok bah, ki jaka tih maw ruh kin sdang noh, tangba kim dei pat ban shalan sha Bangladesh.
La ong shuh ba ki jaka pynmih jingbam, ki jaka shna mawit, ki jaka pynmih khaw bad pynmih umphniang, kin sdang noh ia ki jing trei kam jongki, kiba don shabar ka Municipal. Nangta la shah ruh ia ki jaka rep slasha ba kin sdang ia ki kam, tangba kin pyndonkam ia mar shiteng ki nongtrei, na kaba ki ju don baroh shi katta.
Na bynta ki jaka kiba hap ha Shillong bad ha Mylliem Block, la iathuh bad ki nongshna ilektrik, ki nongshna um, ki misteri ki nongshna motor, IT repair, kin sdang noh ia ki kam jongki. Nangta ki dukan die lang, kin leit ai hi sha kito kiba donkam sha ki nongkyndong, da ka jingmynjur jong ka Deputy Commissioner, East Khasi Hills.
U Bah Tynsong, u iathuh ba ka dewbilat, ka biang, na ka bynta ka jingdonkam ka jylla, ha ki ar bnai ban sa wan.
Phi don ban ong eiei?