Shillong: “Naduh lashai ki EMRI kin sdang noh ka jingtrei kam. 200 ngut ki nongtrei bad 43 tylli ki Ambulance ka long kaba eh ia ngi ba ngin shakri hok ia u paid bah” la ong u president ka Meghalaya EMRI Worker Union, u bah Roipar Kharraswai ha kaba mynta ka sngi ka la shim ia ka rai ba kan pynsangeh noh ia ka jingiakhih hadien ba ki ladep ia ka jingialang bad u Myntri ka koit ka khia u Bah A.L Hek.
U President ka MEMRIWU, u iathuh ba ha kane ka jingialang la rai ban thaw ia ka Committee ban peit bad bishar ia ki jingeh jong ki nongtrei EMRI bad hadien ka 2 bnai kin sa pynurlong ia ki jingdawa jong ki baroh.
Ha kane ka Committee u ban ialam da u secretary ka koit ka khiah, u P.Bakshi ryngkat ki briew ka management ki briew na ka tnad labour ki briew na ka tnad transport ryngkat bad 4 ngut ka MEMRIWU. Kane ka Commity kan trei kam naduh ka 25 tarik Naitung 2019.
Halor ka jingdawa ba ka sorkar kan pyniaid hi noh ia ka EMRI u president u la ong “Ka tnad ka koit ka khiah, ka dei ka tnad kaba donkam tam ia ka imlang sahlang kumno kin ai ba kin pyniaid da ki company ki ba na shabar jylla, katba kim tip eiei shaphang ka jylla jong ngi, kumta ngi kyrpad ia ka Sorkar ba kan shim khia ia kane ka phang”.
Phi don ban ong eiei?