Naduh lashai, khang ka sorkar ban wan rah sniang na shabar

Shillong: U symbud myntri rangbah ka jylla u bah Prestone Tynsong, mynta ka sngi u la ong ba ka sorkar Meghalaya naduh lashai ka sngi kata ka 28 tarik iaiong 2020, la khang ban wan kit sniang ne doh sniang, nabar jylla shapoh ka jylla Meghalaya.

U bah Prestone Tynsong u la ong ba ka sorkar ka la shim ia kane ka rai hadien bala don ka jing iap kumba 1000 tylli ki sniang hapoh ka district Dhemaji, North Lakhimpur, Dibrugarh, Sibsagar bad Jorhat jong ka jylla Assam bad hapoh ka district West Kameng jong ka jylla Arunachal Pradesh.

Na ka liang u symbud myntri rangbah u la kyntu ia ki paidbah ban long kiba phikir haba dei bad ka jing bam doh sniang, da kaba shet bha ia ka doh haduh kumba 25 haduh 30 minit.

U symbud myntri rangbah ka jylla u bah Prestone Tynsong u la kyntu ruh ka tnat ba dei khmih ia ka jing ri mrad ban long kiba husiar bad ban ai jing hikai ia ki paidbah; haba dei bad ka jing sumar ia ka jing ri sniang bad kiwei kiwei de hapoh ka jylla baroh kawei.