Shillong: Ka Hynniewtrep Border Dispute Redressal Forum (HBDRF), ka Hynñiewtrep Women Welfare and Development Organization (HWWDO) bad ka Khun Hynniewtrep National Awakening Movement (KHNAM), mynta ka sngi ka la phah ia ka dorkhas sha u myntri rangbah ka jylla u Conrad K Sangma, ban phah rah ia ki mat sha u myntri korbar ri ka sorkar India, u Amit Shah, ban iakren ban wan rah biang ia ka Labang Nongphyllut Dolloiship bad ka Pangam Raliang ki jaka jong ka Block I na West Karbi Anglong Assam sha West Jaintia Hills District jong ka jylla Meghalaya.
Haba kren bad ki lad pathai khubor u chairman jong ka HBDRF u Chandame Sungoh, u la ong ban naduh ka 15 tarik u bnai Lber 1835 haduh ka 15 tarik u Nailar 1947, ka elaka Labang Nongphyllut Dolloiship bad ka Pangam Raliang ka dei ka jaka ka ba hap hapoh ka Jaintia, hynrei mynta ka kynti ia kine ki ar tylli ki jaka, ym shem la kynthup shuh hapoh u pud u sam jong ka Jaintia Hills, hynrei la shu kynthup jubor ia ka hapoh jong ka North Cachar bad ka Karbi Hills District Autonomous Council bad kane ka long beain, kat kum ki jingdon ki kot ki sla.
“Naduh ka 1888 A.D kine ki jaka ki dei ki ba hap hapoh ka block I ka ba don hapoh u pud u sam jong ka Jaintia Hills, hynrei namar ka jingkheinsting ka sorkar, kine ki jaka haduh mynta ka kynti, ym pat lah ban kynthup ia kine ki jaka sha u pud u sam jong jylla Meghalaya” la ong u bah Sungoh.
Haba iakren halor kane ka bynta u bah Thomas Passah President ka KHANM Youth wings u la iathuh ruh ba naduh ka Meghalaya ka la ioh ia la ka jong ka jylla ha u snem 1972 ,ki nongshong shnong ha kine ki ar tylli ki thain Nongphyllut Dolloiship bad ka Pangam Raliang ki la ju ai ia ki dorkhas jong ki ha khmat ki sorkar jong kine ki artylli ki jylla halor kane ka jingbym hun na kane ka jingshah pynhap jubor justi sha ka jylla Assam hynrei haduh kine ki kynti ym pat lah ban shim kano kano ka rai halor kane ka bynta. U la bteng ruh ba ki la don bun ki jingialang hapdeng kine ki artylli ki jylla ha ka kyrdan jong ki myntri rangbah bad ki chief secretaries halor kane ka mat hynrei haduh mynta ym pat don kano kano ka jingshim rai bad kane ka wan rah shibun ki jingeh na ka bynta ki briew kiba sah ha kine ki jaka.
“Ka jingkyrmen na ka bynta ki briew kiba sah sha kine ki thain ka wan biang ha ka 11tarik Jymmang 2000, haba ki myntri rangbah jong kine ki artylli ki jylla hapoh ka jingialam u Prafulla Kumar Mahanta bad U bah E.K Mawlong ki la leit ban jurip ia ka shnong Khanduli village bad ha u snem 2003. U la iathuh ruh ba na ka liang u myntri rangbah ha kato ka por u bah D.D Lapang bad u MLA jong ka Assam u Roupon Singh Ronghang ki la leit ban jurip ia ka jaka sah ki riew phetwir, ha ka shnong Sahsniang bad la shim ia ka rai ban pynphai noh ia baroh ki shnong jong ki Khasi/Pnar na ka Karbi Anglong Assam sha ka Jaintia Hills District Council (JHADC) hynrei haduh kine ki sngi kane kam shem la urlong” la bynrap u Sungoh.
Phi don ban ong eiei?