Naduh Bangladesh wan ai snam khnang u Paul ha Shillong

Shillong, 14 Jylliew:
Mar syn iohi ba don ka prokram ai snam, ka la pynktik ia u Debajyoti Paul uba na Bangladesh ba un leit wut wut ban noh synniang snam ha ka prokram ai snam ba la pynlong da ka Meghalaya Aids Control Society ha State Central Library Shillong mynta ka sngi kaba dei ka sngi synniang snam kyrpang ha ka pyrthei.
U Paul u la wan donkam sha Shillong na Bangladesh, hynrei ka jia ryngkhat katba u dang iaid lynti hakhmat ka State Central Library, u la iohi ia ka prokram kaba iadei shaphang ka jingai snam bad u la ong ia u mama jongu ba un wad jingtip ia ka prokram namar ba u kwah ban leit synniang snam.
Une u nong-Bangladesh u dei uba ju ai snam barabor ha ka ri jongu bad u dei na Sylhet, kum u general secretary ka seng ai snam ha katei ka jylla ka ‘Sanchalan’.
“Nga sngew nguh bad ka long kaba kyrpang ba nga la lah ban noh synniang snam ha India. Ka jingai snam namar ri ka dei kajuh bad ki briew kylleng ki lah ban ai snam namar ba ka dei ka jingpyrshang jong u bynriew”, u la ong.
U la ong ba un wan biang ha ka aiom Khrismas bad snem thymmai sha kane ka jylla.
Ha kaba iadei bad ka jingai snam ha ri Bangladesh, u la ong “ka jinglong jingman ka jingai snam ka biang. Ki don shibun ki seng kiba ju pynlong ia ka jingai snam, kaba kynthup ka Sanchalak, Sandhoni bad ka Bandhan.
Kane ka jingai snam jong u Paul ha Shillong ka dei ka jingjia ryngkhat namar ba ka dei ka sngi ba ka pyrthei ka rakhe ia ka sngi ai snam.
Nalor u Paul ki don shibun ki briew na kane ka jylla kiba la ai snam ialade ha kane ka prorkam.
Ia kane ka prokram ai snam la pynlong da ka Meghalaya State Blood Transfusion Council ryngkat ka jingiasnohkti lang bad ka Meghalaya AIDS Control Society bad ki Licensed Blood Banks, Meghalaya. La ai ruh ia ka phang pdeng, “Aiu nga lah ban leh?”bad ka jingpyrta”ai snam, ai mynta, ai barabor”.
Ha kane ka sngi u Additional Chief Secretary uba long ruh u President, Meghalaya State Blood Transfusion Council, u Y. Tsering u la long kum u kongsan ha kaba u la sam ruh ia ki syrnot sha ki nongai snam.