Naduh ba wan kane ka sorkar NPP, la mih ki kynhun high level

Ka jinglong jingman jong ka sain hima sima ha ki por mynshuwa bad mynta ka iapher shibun ha ki sorkar mynshwa ki paidbah ki ioh bynta lang ha ka roi ka par ha la ki bynta, ki rukom bad ki kyrdan ba pher bapher naduh ki nongrep, ki nongbylla, ki nonghikai kiba treikam la jong haduh ki nongtrei sorkar. Ka don kata ka roi ka par kaba ktah lang ia baroh kum ka imlang ka sahlang.

Hynrei naduh ba wan kane ka sorkar MDA naduh u snem 2018 ba la ialam da ka Seng NPP ka Party ba la seng da u Purno Agitok Sangma napoh Ri-Lum Garo, la mih kita ki kynhun kiba don ha ka lympung ki high level, ki briew kiba don jingiadei bad ka sorkar lem bad ki briew jong ka.

Ban leh ia kino kino ki kam tip tang ma ki, lah tang ma ki, donbor tang ma ki, naduh ka ioh kam ioh jam, ka trei contract, kamai kajih, ka khaii ka pateng bad kiwei kiwei ioh tang maki bad ki briew jong ki, kino kino ki kam donbor tang kita ki kynhun high level ban leh katba mon ym don ba nud ban saham ne kren pyrshah eiei. Haba kumta ki iap ki rit ki ria ki im tang kita ki high level.

Ha kane ka rukom ka iap ka sur ki paidbah ka Democracy kaba ngi ong ka sorkar jong ki paidbah da ki paidbah bad na ka bynta ki paidbah.

Ka jinglong jingman jong ka sainhima sima hapoh ka jylla ha kine ki sngi, bun tang ki jingialeh kput bad ka jingwah burom palat hapdeng ki para Nongmihkhmat, kata hapdeng ki nongmih khmat kiba don ha ka liang synshar kiba don haka sorkar bad kita kiba don haka liang pyrshah (Ruling and opposition party).

Kane ka jingleh kput bad shah leh shilliang khmat ka jur bha khamtam ha ki Constituency jong ki nongmih khmat kiba don ha ka liang pyrkhat, wat la bunsien ki nongmih khmat ki ju pynpaw bad pynsngew ia ki jingeh, jingdonkam jong ki paidbah ka Constituency. Hynrei la shu leh klet bad shah pynsyllang ha kita ki nongmihkhmat kiba bat ia ka bor synshar kum u Myntri Rangbah bad ki Myntri sorkar, wat la ki paidbah ki donkam shisha ia ki kam pynroi, hynrei tang namar ba ki dei na ki Constituency jong ki MLA ba don ha ka liang pyrshah haba kumta hato ki dei ka jingpynsyllang ia u nongmihkhmat ne ia ki paidbah kane ka paw ba ka jingburom ia ki para nongmihkhmat kam don shuh.

Ka dei ka kamram jong ka sorkar lyngba kita ki nongmihkhmat kiba bat ia u lakam synshar hapoh ka sorkar ban peit ia ka jingbit jingbiang ki jingdonkam jong ki paidbah nongshong shnong ka jylla hi baroh kawei, ban wanrah ia ki kam pynroi ba ki paidbah ki dei hok ban ioh, ym ban shu ai kam pynroi beit tang ha ki Constituency jong ki nongmih khmat kiba don haka liang synshar kata kaba bakla shibun, haka ri kaba synshar paidbah kam dei ban long kumta. Ka jingdon jong ka liang pyrshah kaba khlain ka iarap ban ioh ka sorkar kaba trei hok ban ioh ka synshar kaba khuid khnang ba kita kiba don haka liang synshar kiba bat ia u lakam synshar, kin nym ioh lad than ban leh katba mon, ka liang pyrshah ka don ka bynta kaba khraw, ka long kum ka nong kdew lynti, haei ka don ka jingduna, jingbakla bad jingdkoh trei kam jong ka sorkar, ban long kum ka nongpeit pyrman ia ki jingtrei kam jong ka sorkar.

Ban long ki nongmih khmat ka long ban shakri ia ki paidbah haka Constituency hynrei haba long Myntri Rangbah, long Myntri Sorkar ka dei ka kamram ban peit iaka jylla hi baroh kawei, kane ka jingialeh kput bad leh shilliang khmat hapdeng ki para nongmih khmat paidbah ka la long kum ka raibi, ka wei ka sorkar hadien kawei ka sorkar, tang ka jingbuaid bor bad kwah burom palat jong ki nongialam i kumba kim don por shuh ban trei na ka bynta ka jingbit jingbiang jong ki paidbah ban kyntiew iaka jylla ki la shu bunkam tang ban ia knieh bor ia knieh shuki, tang kumno ban myntoi ia lade, iakiba ha iing ha sem bad katto katne ngut ki nongkyrshan kiba ha khmat.

Albert Maring
Ri Bhoi District