Naduh 5 lyngkot, yn sdang biang ki kyndon pyrkhing, na ka khlam covid ha ka jylla

Shillong: Mar sien dep ka aiom jong ka jinglehkmen ha ka jylla, na ka liang ka sorkar jylla, mynta ka sngi ka la lum ia ka jingialang ban ia kren halor ka jinglong jingman jong ka khlam ha ka Ri baroh kawei bad kum shi bynta ban khang lad ia ka jingwan iuh kjat une u khniang jingpang Omicron ha ka jylla, ka sorkar ka la shim ia ki katto katne ki sien jam ban pyrkhing ia ki kyndon ha ka jylla.

Haba ia kren bad ki lad pathai khubor na ka liang u Myntri rangbah ka jylla, u Conrad K Sangma ha ka sngi lah sngi u Blei jong ka taiew, u la iathuh ba naduh ka 5 tarik mynta u bnai ka jylla, yn hap ban bud biang ia ki kyndon kiba ka sorkar jylla kan pynmih bad kane ka long ban khanglad ia u khniang jingpang Omicron un ioh ban rung sha ka jylla. “Na ka liang ka sorkar ka la shim ia ka rai ban ym shah ban lum paidbah, lait noh tang katto katne ki jingialang ki ban pynbeit ia ki jingbun briew. Kane ka long namar lada don ka jingialum briew kane ka jingpang ka lah ban saphriang sted bad namar ba ha ka jylla ym pat don kiba iohpang na u Omicron kumta ka dang biang eh ka por ba ngin sdang ka jingpyrkhing khlem da ktah ia ka ioh ka kot ki paidbah”u la ong.

U Myntri rangbah u la iathuh ruh ba kan don ka jingpyrkhing ia ka leit ka wan bad kane ka jingpyniaid kan ia pher kawei na ka wei ka District, hynrei ha East Khasi Hills, Shillong ia ki kali riew shimet kin iaid da ki odd bad even number.

U Sangma u la iathuh ruh ba kawei ka rai kaba ki la shim mynta ka sngi, ka long ban pyrkhing ha ki khyrdop ki ban rung sha ka jylla ha kaba ki nongwan rung sha ka jylla nalor ki syrnot ba la dep ban ai Tika arsien; ki briew kiba wan rung sha ka jylla kin hap ban ai ruh ia ki syrnot test Covid kaba 72 kynta bad lada kim don kin hap ban shah test ha kine ki khyrdop rung sha ka jylla. U la bynrap shuh shuh ba la rai ruh ban pynjari ia ka Curfew miet ka ban sdang naduh ka 10:00 baje mynmiet ha Shillong bad kiwei pat ki jaka la bynshet ia ki Deputy Commissioner jong ki District bapher bapher.

U Myntri rangbah u la ong ba ka jingsted jong ka jingsaphriang jong une u khniang jingpang ka long kaba buh jingma bad wat la kat kum ka kaiphot kaba la pyni na kiwei ki jylla ba ka jingpoi hospital bad ka jingkhlad na une u khniang jingpang ka kham duna ban ia nujor bad u Delta varient, hynrei u long u ba lah ban pursted bha bad kan sa don ka por ba u Omicron un sa poi ha ka jylla Meghalaya ruh.

“Kum ka sorkar jylla, ha ka bynta ba ar jong u Covid -19 ka jylla ka la mad u shibun ki jingeh ha kaba ngi la lah ban pynkhreh ia ki lad iada ha kaba mynta ka kynti hi ngi la long ki ba la pynkhreh, wat la ha kine ki snem ba la dep ka la don ka jingeh ka jingjynjar hynrei ngi donkam ban shim khia ia ka e” la ong u Myntri rangbah.

Kum shi bynta ban don ka jingshngain bad kum juh ka kamai kajih jong ki briew kan ym shah ktah; na ka liang ka sorkar ka la shim ia ki lad ki lynti ban pyrkhing biang ia ki katto katne tylli ki kyndon“ u la bynrap.