Naduh 3 snem kin hap leit skul, tyrwa ka Education Policy thymmai

Shillong: “Kawei kaba sngew ktah ki kynhun rit paid ka long ba kam don kawei ruh ktien kaba kdew ia ki Christian Minority school. Ki sngew thut ruh ia ka School Managing Committee ha kaba kam don ka jingkdew ia ka kamram jongka”, la ong u myntri ka tnad pule puthi ka jylla, u bah Lahkmen Rymbui.
U bah Lahkmen ula iakynduh mynta ka sngi ia ki nongialam na ki kynhun rit paid kum ki Khristan, Muslim bad kiwei ban iakren ia ka National (Draft) Education Policy ban pynkylla dur thymmai ia ka rukom pyniaid ia ki skul, kolej, skulbah ruh kumjuh.
Watla u myntri u la kubur ba ka dei ka policy kaban wanrah ka jingkylli kaba jur bha ha ka lyngkha ka pule puthi ha ka ri hynrei ki don ki mat kiba ka sorkar kan sa iakren bad ka sorkar pdeng kiba iadei bad ka jingeh bad ka jingktah ia ki kynhun rit paid.
“Ka sorkar jylla kan rah ia kane sha ka sorkar pdeng ha ka jingialang kaban sa long shen shwa ban rai ban pyntreikam ia kane ka policy”, u la ong.
U bah Lahkmen u la ong ba ki don bun kiwei ki jingpynkylla bad kaei kaba ktah ia ka jylla ba ka long ba kan pyrshang ba ha ka liang ka ktien kan dei beit kumba ka long ne status qou kumba ju long ha kaba ka ktien phareng kan dei beit ka ktien ba kongsan ne major language katba ka Hindi kan long tang naduh 5-8 klas. “Ngin pynsngew ba ia ka language policy ne kaba iadei bad ki ktien ban hikai, ngin dawa ban pynneh kumjuh ha kane ka jylla ha kaba ka ktien phareng kan dei kaba kongsan namar ba ka pule puthi ka dei ka sobjek ba ka sorkar jylla ka don bor ym tang ka sorkar pdeng ne Concurrent list”, u la ong.
U la ng ba ka Draft Education Policy ka sorkar India ka la tyrwa ba ki khynnah ki dei ban sdang leit skul naduh ka rta kaba 3 snem bad ka hok ban ioh jingsted ne ka right to education ruh kan treikam haduh ka rta kaba 18 snem.
Haba kren mynta ka sngi, u bah Lahkmen u la iathuh ba ka polic nalor ka jingthmu ban sdang leit skul ia ki khynnah naduh ka rta kaba dang 3 snem, la phiah ruh ia ka jingpule ha ka saw bynta, kaba mut pre-nursery haduh klas 2, klas 3 haduh 5 kum ki primary, 6+7+8 Upper primary bad 9+10+11+12 secondary.
U myntri u la ong ba ha kaba iadei bad ka Teachers Education kiba long kum ki stand alone institution kim dei shuh ban don kum ki B.Ed hynrei kin dei beit ki college namar ym dei ban hikai tang kawei ka jingpule ne course.