Naduh 16tarik Risaw, pyn sangeh ka sorkar ia ka jingbei tyngka bad ka khlam covid

Shillong: U Symbud myntri rangbah ka jylla u bah Prestone Tynsong, u la iathuh ba hadien ba ka ACMR, ka la pynsangeh ia ka jingbei tyngka sha baroh ki jylla, ha kaba iadei bad ka khlam Covid -19; ka Sorkar jylla mynta ka sngi ka la shim ia ka rai ba naduh ka 16 tarik u Risaw 2020 kin sangeh noh ka jingbei tyngka ha kaba iadei bad ka khlam Covid -19.

Haba ia kren bad ki lad pathai khubor, na ka liang ka sorkar jylla ka la shim ia ka rai ba naduh ka 16 tarik u Risaw 2020; kino kino kiba wan sha ka jylla Meghalaya ki dei ban test ia lade lyngba u Rapid Antigen test (RAT) bad ia kane hap ban siew ha ka dor ka ba long T 500. U la ong ruh ba ki briew ki ba wan na kiwei ki jylla, lada ki la dep test hapoh ka 72 kynta lyngba ka RTPCR test ki dei ban wanrah ia ka Certificate ban lait na kane ka jingshah test. Kane ka long kat kum ka Protocol ba la pynmih da ka ICMR.

U bah Prestone u la ong ruh ba naduh ka 16 tarik u Risaw 2020 ki briew ki ba kwah ban phah leh test ia lade kin hap ban siew T.500, na ka bynta ka Rapid Antigent Test bad T.3200 na ka bynta ka RT-PCR test. U la ong ba ki briew kiba dei ki High Risk Contact bad ki briew kiba don ia ki BPL card kin lait na kane ka jingsiew ia ka dor ba la buh na ka bynta ban test Covid -19 bad ki dei ban rah da ki ne ki BPL card ban lait na ka ne ka jingsiew. U la iathuh ruh ba ki MHIS kin lah ban bei tang na ka bynta ban sumar, hynrei yn ym lah ban bei na ka bynta ka jingtest. U la iathuh ba na ka bynta ka jingtest RT-PCR lah ban leh ha Pasture Institute, ha Civil Hospital Nongpoh, ha Civil Hospital Nongstoin, ha Civil Hospital Tura , Civil Hospital William Nagar, Civil Hospital Bagmara, Civil Hospital Ampati, ha CHC Rusebelpara,CHC Khliehriat , CHC Mawkyrwat, H Gardon Hospital,Nazareth Hospital bad Bethany Hospital, MCH Hospital Jowai.

Ka sorkar ka la shim ruh ia ka rai ban buh ia ki Isolation Corona Center ki ba hap ban siew bad ia kane la bthah ha ki Deputy Commissioner ban buh ka jingialang ban ia kren bad ki nongpyniaid jong ki Hotel lane ki Guest House halor kane ka bynta. U bah Prestone u la iathuh ba naduh ka 16 tarik u Risaw 2020 ki briew kiba don ha ki Corona Center kin hap ban siew noh ia ka bai bam jong ki bad ia kane la aiti ha ki Deputy Commissioner ba kin pynbeit ia ka dor halor kane. U la iathuh ruh ba ki briew ki ba don ia ka BPL kin lait ban siew ia ka baibam jong ki bad lada ki don kino kino ki bal ah ban wanrah ia ka bam jong ki na la ki ing ki sem.