Shillong: Kum shi bynta ban tehlakam ia ka jing pur ka jing pang ‘corona virus’ hapoh ka jylla khamtam hapoh ka East Khasi Hills, na ka liang ka ophis treikam Deputy Commissioner (DC) ka la pynbna ban pynjari biang iaka korphiw miet naduh 15 tarik jylliew haduh 22 tarik jylliew 2020 naduh ka por 9 baje mynmiet haduh 5 baje mynstep hapoh ka East Khasi Hills.
Ka ophis treikam DC ka la shim ia kane ka rai kum shi bynta ban pyntreikam iaki kyndon ka tnat ka koit ka khiah ka jylla kum shi bynta ban iakhun pyrshah ka jing pang ‘corona virus’ daka ba khanglad ia ka jing ialum paidbah khamtam hapoh ka nongbah Shillong.
Ka hukum na ophis treikam DC la batai ba ka korphiw miet kan nym treikam ia ki nongtrei sorkar, ki pulit bad shipai, ki nongtrei ka tnat ka koit ka khiah, ki dukan die dawai, ki dukan die marbam, ki nongtrei ka tnat MeECL, NEEPCO, Power Grid, FCI, PWD, PHE bad ka Shillong Municipal Board, ki nong leit sam bam, ki petrol pump, ki nongtrei ka sorkar bad ki nongthoh khubor.
Ka hukum ka la kyntu ia baroh bad bud ryntih ia ki kyndon ka tnat ka koit ka khiah ka jylla haba dei bad ka jing ia jngai na kiwei pat.
Nalor ka korphiw miet, ka hukum na ka ophis treikam DC ka EKH la pynshai ruh ba la khang iaka jing ia rung ia mih briew na kiwei ki jylla sha kiwei pat bad ki dukan kiba plie kin dei tang katto katne kiba la ithuh ka sorkar bad kidei ban plie tang haki por bala pynbiet ka bor district. La kyntu ruh ia ki paidbah ban kiar na ka jing ialum paidbah bad ban bud ryntih iaki kyndon ka tnat ka koit ka khiah haba dei bad ka jing tehlakam iaka jing pur ka jing pang ‘corona virus’ hapoh ka jylla.
Haba dei bad ka jing iaid kali, ka hukum na ophis DC la batai ba ki kali naduh ki kali riew shimet haduh ki kali paidbah ki dei ban iaid katkum ki kyndon ba la pyllait dang shen, katba ia ki swimming pool bad kiwei ki jaka ba khring paidbah ym pat shah ban plie katba ki ‘restaurant’ ki lah ban plie hynrei ki dei tang ban shu rah sha ing.
Ia kane ka hukum la pynmih kum shi bynta ban buh ki kyndon na ka bynta ban tehlakam ia ka jing pur ka jing pang ‘corona virus’ hapoh ka jylla.
Phi don ban ong eiei?