Naduh 1 Lber, ki nongshong kali ruh, ki hap deng jingda tyrpeng, ne u nongniah un shah dain T.1,000

Ka khubor jong ka North East Now, ka iathuh ba naduh ka 1tarik Lber 2020, ki nongshong kali kin hap ban deng ia ki jingda tyrpeng jongki (seat belt) bad lada jia ba kim deng, ki trai kali kin hap siew ia ka kuna kaba T.1,000.

Katei ka kuna, kan trei kam hapoh ki kyndon jong ka Motor Vehicles Act, kaba thymmai bad ka bym pyntrei kam satia haduh ha kine ki sngi.

“Mynshwa tang u nongniah bad uba shong ha khmat, ki hap ban deng jingda tyrpeng, hynrei ha kane ka ain kaba mynta, kito kiba shong ha dien ruh ki hap ban deng ia kitei ki jingdeng snieh” ong ka tnat pyniaid kali.

Ka World Health Organisation (WHO), ka iathuh ba u jingda tyrpeng, u iarap haduh 25 percent ban nang pynduna ia ka jingiap ne jing mynsaw, lada jia ka jing ia tyngkhuh kali.

Ka ain jong u jingdeng snieh, ka trei kam ha ka Motor Vehicle Act, kaba la mynjur da ka Parliament ha u snem 2019, ha kaba la pyntrei kam ia kiba bun bah ki ain jongka naduh ka 1tarik Nailur, 2019.