Naba tyngkhuh ka trok, ioh kynrup ei ki paidbah, ia ki syiar, ban ia bamdoh

Ka jing ia tyngkhuh jong kawei ka trok, ha ka surok bah ha Agra, ha ka sngi balang, ka la kylla long ka jingduhnong kaba jur than, ia u nongniah jongka, katba ha kawei pat ka liang, ka la ai ia ka jingmyntoi kaba jur ia kito kiba shong iing bad kiba iaid hangtei hajan, namar ba ki la ioh ban kynrup katba mon ia ki hajar tylli ki syiar, kiba don ha katei ka trok, na ka bynta ba kin ioh bam doh shngiam, ha kiba kum kine ki sngi bam khawai.

Katei ka trok, ka la ia tyngkhuh, ha katei ka surok bah, namar ba ka bneng, ka la dum ngiew palat, na ka jingtap u lyoh thah, uba rben bha, ha katei ka surok bah bad katei ka la pynlong ia kiba bun ki kali, ba kin ia tyngkhuh ha ka surok bah.

Mar ia jia, katei ka jingjia, ka trok, ka la julor thiaw bad ki la don bun spah tylli ki syiar kiba iap bad sa bun hajar tylli, ki la lait phet sha surok bad ka dei ha katei ka por, ba kito kiba iohi, ki la leit ban kynrup ia kitei ki syiar bad don ruh kiba lum da ki byrni bad thep da ki phew tylli ban rah leit bam doh ialade.

U nongniah jong katei ka trok, u iathuh ha ka lad khubor India Today, ba ula ai sngewbha ia ki briew, ba kin kem ia kitei ki syiar, namar ba ki la don bun bah ruh, kiba la iap, na ka jing iatyngkhuh katei ka kali. La iathuh, ba ka dor thied jong kitei ki syiar, kiba don ha katei ka kali, ka shongdor haduh T.2.5lak.