Naba thok u pulit baieid, phasi ka samla ha thanad Nartiang

Jowai, 9 Nailar:
Kawei ka samla lud kada dang 14 snem ka rta kaba la ia ieid thep myn siem bad uwei u Pulit uba la tip kyrteng kum u Mebankyrshan Khar bangar (27) uba trei ha Nartiang PIC (Police Investigation Center) u la shah kynnoh ba u la don kti ban phon ban pah bad ban pynjot ia ka jinglong sotti jong ka haduh ba ka la hap ban aiti noh ia la ka jingim ha u tyllai Phasi hapoh ka kamra thiah jong u, ha ka mala kaba ar jong ka thanad ha Nartiang PIC hynnin ka sngi Saitjain.
Katei ka samla rit kaba dang 14 snem ka rta, ka dei kaba la tip kyrteng kum ka Purnima Talang kaba dei ka khun jong ka kong Pyn-I Talang, ha kaba ka la ia kynduh bad u pulit langrut, uba dang shu wan trei thymmai ha Nartiang PIC.
Kane ka jingjia ka la jia hynnin ka sngi ha ka por shiteng sngi antad, namar ia ka metiap kaba la sdien phasi hapoh katei ka karma kaba halor la lap bad iohi nyngkong ha ka por kumba 12:10pm.
Ia ka metiap jong katei ka khynnah la rah sha Ialong District Civil Hospital, Jowai na ka bynta ban pyndep ia ka Post mortem ha shwa ban aiti ia ka met jong ka sha kiba haiing hasem mynta ka sngi U Blei. Kiba ha iing ki la iathuh ba ia ka metiap jong ka, yn pynkhuid lashai ka sngi ha Lum jingtep ka Balang Presbyterian Barato mynta ka sngi Nyngkong.
Halor kane ka khubor na ka liang jong u Rupang un sa buh dien khamtam ha ka jingiadei bad ka jingujor pyrshah kiba ha iing ia utei u pulit uba la thok la shukor ia katei ka khun ba lui lui bad ba dang rit rta jong ki katkum ka jingkynnoh jong ki.