Naba suba bam doh masi, shah siat bad bom iap 2ngut ha Haryana

Chandigarh:Tang na ka daw, ba ka don ka jingsuba jur, ba u dei uba rah doh masi, kumta u khynnah samla, uba dang 19 snem ka rta bad uba dang pule Class 12, ula shah siat iap ha Faridabad jong ka jylla Haryana. Utei uba suba ba utei u khynnah samla, u kit doh masi ha ka met jongu, ula beh thong ia u haduh 25 Kilometre ka jingjngai bad u sa siat iap syndon ia u. Ha kane ka jingjia, ki don 5ngut kiba la shah kem.

U Aryan Mishra, u leit kai bad ki paralok jongu, U Harshit bad U Shanky, ha ka shiteng synnia jong ka 23tarik Nailar ban leit ia bam shaw; hynrei kita ki nongpahara ia ka jingshalan masi tuh, ki la iathuh ha ki pulit, ba ki don ki briew kiba kit masi bad kiba iaid da ka Duster bad ka Fortuner. Haba katei ka kali, kaba u don U Aryan, ka dang iaid shakhmat, ha ryngkat U Harshit, nangta sa U Shanky bad arngut ki kynthei, hynrei kitei ki nongpahara ki la pynieng ia katei ka kali bad haba kim ieng kumta ki la beh thong bad siat na jingkhang iit ia katei ka kali, ha kaba u kuli ula leit die ia U Aryan. Mar kumta, haba U Aryan, ula shah siat kumta, ula iarap lem ia U Aryan, hynrei kitei ki runar, ki la siat sa na ka shadem jong U Aryan bad ula iap noh ha shen. Ki pulit ki la kem ia ki san ngut kiba don bynta ha katei ka kam pyntriem bad kitei ki kynthup ia u Anil Kaushik, Varun, Krishna, Adesh bad u Saurav.

Kane ka jingjia, ka la jia tang hadien khyndiat sngi, ha kaba uwei u nongbylla, uba na West Bengal, ula shah bom iap ha Charkhi Dadri district jong ka Haryana, tang namar ka jingsuba ba u bam doh masi. Ki pulit ki la kem ia 7ngut ki briew, halor katei ka jingjia. Utei u nongbylla, ula shah bom iap ha ki nong pahara ban khang lynti ia kiba kit masi bad katei ka la jia, ha ka 27tarik Nailar 2024. Utei uba shah pyniap, u dei u Sabir Malik bad la iathuh ba kitei kiba pyniap, ki la khot ia U Malik, sha kawei ka dukan kaba don hajan, da kaba tyrwa die ia ki plastic kiba thylli bad hangta ha dukan, ki sa bom ia u, hynrei ynda haba ki la ia mih ki paidbah ban khanglad ia katei ka jingshoh bein jongki, ki la rah sha kawei pat ka jaka bad ki sa shoh haduh ba un da iap syndon. U Malik, u dei uba shong ba sah ha Bandhra bad u ju lum ia ki tiar jot bad u sa die kylla ia ki.