Shillong,12 Jylliew:
Myn ha ka 6 tarik mynta u bnai u Bah Wanshai Laitmiet , uwei na ki nongniah sumo Sohra u la mynsaw jur na ka daw ka jingshah pajut shkor jong u ha uwei u heh pulit IPS u Anand Mishra, ha ka por ba ki pulit ki dang pynlong ia ka jing talasi kali. Halor katei ka jingjia ki seng bhalang na Sohra ba kynthup ia ka KSU,FKJGP,Seng Samla Saitsohpen, ka Association ki nongniah Sumo ki la pynpaw ia ka jingsngewkhia kaba jur da kaba dawa ruh ba dei ban pynshitom ia utei u heh pulit ba leh tohmet ia bun ngut ki nongniah sumo ha katei ka sngi ba la pynlong ia ka checking da kaba byrngem ruh ba lada ka sorkar kam leh eiei, kin shim da ki wei pat ki lynti.
Hadien katei ka jingjia ki Nongialam ki sengbhalang Sohra kiba kynthup ia kitei ki seng hapoh ka joint action committee jong ki, ki la pynlong ia ka jingiakynduh bad ki Majistor mynhynnin ka sngi, ha kaba na ka liang ki Majistor ki la pynpaw bad kular ba nangne shakhmat haba pynlong ia kiba kum kitei ki checking , ki ruh kin ia donlang ha ryngkat bad ki pulit.
Shuh shuh haba ia kren bad u President ka KSU South Khasi Hills u samla Damil Bynnud, u la ong ba ki Majistor ki la iathuh ba utei u heh pulit uba la donkti ban pynmynsaw ia Bah Laitmiet u dei uba dang don hapoh ka jingshah hikai jong u, ha katei ka kam.
Wat la ki jingiakren ki la dep ha ka jingiakynduh jong ki seng bad ki Majistor hynrei haba ia kren bad u president ka KSU la sngewthuh ba ka case ka dang iaid hapoh ka jingtohkit jong u Superitendent of Police, Shillong.
Kum ban shu pynkynmaw ba u Bah Laitmiet u la shah sumar ha CHC Sohra namar ka jingmynsaw jong u na ka shkor ka diang hadien ka jingshah pajut ha u Anand Mishra,IPS ha Lad Thanad Stand sumo Sohra.
Phi don ban ong eiei?