Naba shah khang dukan, tur ki nongiew sha thanat u Syiem

Shillong:Halor ka jingkiew sted eh jong u khniang jingpang Covid 19 ha ka jylla, ka Sorkar jylla lyngba ki bor pyniaid district jong ka East Khasi Hills, ka la pynmih ia ka hukum ban phah khang shwa shipor ia katto katne ki dukan ha Nongbah Shillong, kiba kynthup ha Iewduh ki bym die satia ia ki mar bam mar dih kaba la sdang naduh ka sngi nyngkong kata ka 26 tarik u Iaiong 2021, hynrei la iohi pat ba na ka liang jong ki nongshong dukan ha Iewduh kiba im jakpoh da kane ka kam, mynta ka sngi nyngkong ki la leit ban tur sha thanat pulit Syiem jong ka Hima Mylliem ban dawa ban ailad ia baroh ki dukan ban plie da kaba pyniaid da ki odd bad even nombar.

Katkum ki tyllong khubor kiba la ioh lum, la iathuh ba mar syn tip ia kane ka jingdawa jong ki nongshong Iew, na ka liang jong ki bor pyniaid district ki la leit sha ka thanat jong u Syiem ka Hima Mylliem ban pynsngewthuh ia ki paidbah bad na ka liang ka ADC, ka Kong B Rani, ka la pynshai ba ka jingphah ia kine ki dukan kan long tang shipor ha kaba ki bor district kin peit thuh shwa ia ka jinglong jingman ha kine ki ar sngi ki lai sngi, ki ban dang wan bad ka la ong ruh ba kane ka jingpynbeit jong ka Sorkar kan dang don ka jingkylla.

Shuh shuh na ka liang ka Magistrate ka la kyntu ia kine ki nongshong dukan ha Iewduh ba kin iaishah lem shipor bad kane ka jingpynbeit jong ka Sorkar, namar yn nym lah ban plie ia ka Iew da kaba khapngiah bad ka la ong ruh ba yn sa pynsngew sha ki bor kiba halor ia ka jingdawa ban ailad plie ia ki dukan da ki odd bad ki even nombar na ka bynta ban ioh plie lang baroh ki dukan.

Na ka liang ki nongshong dukan ha Iewduh ki la pynpaw ia ka jingsngewduhnong kaba khraw, namar ka jingshah phah khang bun tylli ki dukan khamtam ki dukan jong kiba shong die ha madan.
U Myntri jong ka Hima Mylliem, u Bah MB Kharlukhi u la kyntu ia ki nongshong Iew ba kin iaishah lem shipor bad ki bor pyniaid, namar ba um kwah shuh ban khang ia ka Iewduh kumba la leh ha u snem u ba la dep ha kaba u la kular ba ka Hima kan sa peit ia kaba bha tam na ka bynta ki paidbah.