Naba rem elekshon ha Shella, mih noh U Bah Batyngshain Ryngnga, na ka seng Congress

Shillong: U bah Batyngshain Laitmon Ryngnga, uba dei u kandidet jong ka seng Congress, ha ka elekshon shiteng samoi na Shella bad uba dei ruh U President jong ka Shella Block, ula mih noh na ka seng Congress, naduh mynta ka sngi.

Ha ka shithi sha U President jong ka Pradesh Congress Committee (I), U Bah Batyngshain, ula pynpaw ba ka daw jong ka jing mih noh jongu, na ka seng Congress, ka dei namar ba ula shah rem ha ka elekshon ba ladep na katei ka Constituency bad u don ia ka jingsngew kit khlieh ialade halor katei ka jingjia.

U bah Ryngnga, uba ioh 1,715 vote ha katei ka elekshon shiteng samoi, u ai khublei ia ki nongialam jong ka Meghalaya Pradesh Youth Congress, ia U Dr Mukul Sangma, nongialam ka liang pyrshah, ia ki MLA, MDC bad ia ki nong kyrshan jong ka seng Congress na Shella Constituency.