Nongpoh, 06 K’lyngkot: Haba shimkhia halor ka jingujor da ki kmie ki kpa jong ki khynnah, kiba la shah kyntait ha ka por ba ki thmu ban phah leit ban pule ia ki khun hapoh ka skul Jirang Government Higher Secondary School, hynnin ka sngi ki nongialam ka KSU Jirang Circle lyngba ka Education Cell, kaba la ialam da u Samla Kitdor Thangkhiew, ki la leit ban kynduh ia ka Ruby Z Das, DSEO ka Ri Bhoi na bynta ban iakren halor katei ka kam, ba ki samla pule ki la mad ia ka jingshah kyntait ha ka por ba ki thmu ban leit pule hapoh ka Jirang Government Higher Secondary School.
Ha ka kyrwoh kaba la phah da ka KSU Jirang Circle, la ong ba ka nongrim kaba la pynlong ia ki nongialam ka seng ba kin leit ban kynduh ia katei ka heh jong ka tnat pule puthi ha ka jylla, ka dei hadien ba ki la ioh ia ka jingujor, ba la don kumba 38 ngut ki khynnah pule kiba thmu ban leit ban pule hapoh katei ka jaka pule, hynrei kaba la don tang kumba 6 ngut kiba la ioh ban leit pule hapoh katei ka jaka pule.
Haba iadei bad katei ka jingleit kynduh DSEO da ki nongialam ka seng, kitei ki nongialam ka seng ki la dawa na katei ka heh jong ka tnat pule puthi ba ka dei ban pdiang ia ka ka jingpynrung skul ia ki Khynnah pule bad kumta ha ka jingiakren, na ka liang ka SDSEO ka la ai ia ka jingkular ba kito ki khynnah kiba la shah kyntait ba ki dei ban pynrung bad ban pdiang lut ia kitei ki khynnah kiba thmu ban leit pule hapoh katei ka skul, khnang ban lait na ka jingpep skul ba shiteng por jong ki khynnah.
Halor katei ka jingleit kynduh DSEO da ki nongialam ka KSU Jirang Circle lyngba ka Education Cell, na ka liang ka KSU ka la ai ka jingkhublei bad sngewnguh ia ka DSEO, namar ba ka la shimkhia halor katei ka mat kaba la rah da ka KSU Jirang.
Phi don ban ong eiei?