New Delhi: Na ka bynta ban pynhap slap, kam dei satia ka kamram jong U MLA bad U MLA ruh, um don skhim ban pynioh slap ia kito kiba don ha ka jingkyrduh um; hynrei, ki kynthei jong ka Uttar Pradesh, ki la pyndonkam da U MLA jongki, na ka bynta ban pynkyrsum ktieh ia u, kum shi bynta jong ka jingduwai ia ka blei pynioh slap.
La iathuh ba U MLA jong ka seng BJP, U Jaimangal Kanojia, ula shah pynsum da ka ktieh ha Maharajganj, kaba ha Uttar Pradesh. La iathuh ba ki kynthei jong katei ka shnong, ki la sngew kutlad shi katdei, na ka jingduna slap, kaba jubor ha kine ki sngi bad la iathuh ruh, ba ka ju long ka rukom ban pynsum ktieh, ia ki kynja ba khraw, kum ki rangbah shnong bad kiwei, ba kan kham sngew tynnad katei ka blei slap.
Kumta ki kynthei jong ka Pipardeura ha Maharajganj, ki la bat ia U MLA jongki, uba leit iaid lynti ha katei ka shnong bad ki la pynsum ia u da ka ktieh. Ym tang U MLA, hynrei, ki la pynsum lang ia u rangbah shnong lane U Chairman jong ka Nagar Palika, U Krishna Gopal Jaiswal. “Ka dei ka jingngeit, ba ka jing pynsum ktieh, kan pynsngewbha ia ka blei Indra Dev. La ong ruh ba ka jingduna slap, kan ktah jubor ia ki lyngkha kha” ong ka Munni Devi, kawei na ki kynthei jong katei ka shnong.
“La ju pynsum ruh ia ki khynnah rit, ha ka jinglehniam Kal Kalouti, ban pynsngew tynnad ia ka blei Indra Dev” la ong shuh shuh.
U Kanojiya, u iathuh ba ula shah tabain da ka ktieh ha baroh shirynieng jong ka met jongu, ha ki kynthei bad ki khynnah ha katei ka shnong. “Katba nga dang iaid ha katei ka shnong, ki la wan shibun ngut ki kynthei bad ki khynnah, kiba pynsum ianga da ka ktien bad kane ka dei ka jingngeit kaba rim, kaba ju pynsngew tynnad ia ka blei Indradev. Nga ngeit ba ka blei kan sngap ia ka jingduwai jongki bad wan rah noh shen ia u slap” ong U MLA.
Phi don ban ong eiei?