Naba bun ki dkhar kiba long CRPF, kin ngeit beit ïa ka Assam, ong ka HBDRF

Shillong:Ka Hynñiewtrep Border Disputed Redressal Forum (HBDRF) ka ai jingkyrshan pura ïa ka rai jong ka Dorbar shnong Lapa ngap ban ym phut lane kynriah ïa ki tynrai dieng ba ki la thung ha ka jaka kaba kyrteng Moopyrdet. Kum ban shu pynkynmaw ba ha ka 28 .9.2023 ha ka jingïakren jong ki ar DC’s jong ka West Jaiñtia bad West Karbi Anglong te u DC jong ka West Jaiñtia, u la mynjur ïa ka jingdawa jong ki Karbi ban phut lane kynriah ïa kito ki trai dieng. Hynrei ka dorbar shnong Lapangap pat ha ka jingïalang kaba la long ha ka 29. 9.2023 kila rai ban ym phut na kynriah ïa kito ki tynrai dieng.

Ka Furom ka buh jingkylli, ‘Ba haba ki thung ïa ki dieng la jong ha ka khyndew ka shyiap la jong te balei ki dei ban phut bad kynriah pat? Lada phut ïa kine ki tynrai dieng te ka pyni ba ngi thung shaka jaka jong kiwei keiñ,’ la pynpaw ka seng.
Ka jingmynjur jong u DC bad phut ïa kine ki tynrai dieng ka long kaba bakla bad ka long ruh kumba pyndem hakhmat jong kine ki Karbi. Bad ka long ruh kumba ailad ïa kine ba kin kyntur ïa u pud u sam jong ka shnong Lapangap bad jong ka jylla Meghalaya hi.

Halor ka jingïalang jong ki ar Chief Minister Meghalaya Assam kaba long ha ka 30.9. 2023 ba ki rai ban pynkynriah ïa ki pulit Assam bad Meghalaya bad ban bujli pat da ki CRPF, ka Forum kam pyrshah ïa kane ka rai jong ki hynrei ka kyntu bad ai jingmut ïa ka sorkar ba kam dei ban pynkynriah ia ki pulit jong ka jylla ruh namar ba ki CRPF ruh ki bun ki Dkhar bad kiba control da ka Sorkar Assam da u Himanta Biswas Sharma. Kumta ka bha ba ki Police jong ngi ruh kin donlang bad ïatrei lang khnang ba ki briew jong ngi kin kham sngew sngaiñ namar kiba bun ki paid nongshong shnong jong kane ka shnong kim sngewthuh ïa ka ktien ka thylliej.

Ïa ki mat ïa pynbeit pud pat ka Forum ka ai jingmut ba ymdei ban pynleit jingmut lane ïakren shwa ïa ka Psiar bad Khanduli Sector. Namar lada pynleit jingmut shwa ïa ka Psiar bad Khanduli te ngi lah ban duh noh ïa ka Block bad ka long ruh kumba tynsah prek ïa ka Block -1 shapoh Assam, wei ba la ïabeit ïa ka Psiar bad Khanduli te ka eh bha ban ïakren pat ïa ka Block -1. Ka bha ban ïakren shwa ïa ka Block -1 bad ynda wan ka Block -1 sha Meghalaya te kine ki Psiar Khanduli kila wan lypa hi shapoh Meghalaya bad kane kan pynsuk bad sting ïa ka sorkar ruh.

Ka Forum ka kyrpad ruh ïa ka sorkar ba ha ka jingleit jngoh leit jurip jong ki ïa ka Block – 1, kim dei ban leit tang ha Khanduli, Mukroh, Psiar lane shaki shnong ba marjan hynrei ki dei ban leit shaduh shaki shnong kiba kyndong tam bad kiba kut jong ka Block-1 kiba dei ban re-transfer biang sha Meghalaya,’ pynkut ka kyrwoh na ka Forum.