Jowai: Ka All Jaintia Cement and Clinker Transporters’ Association (AJCCTA) ka la maham jur ia baroh kito ki driver jong ki trok kiba kit masi ban shallan tuh sha Bangladesh ban bret pathar ia ki masi iap kat shaba lap ha shi lynter u Surok Bah.
U ma Balen Thubru uba dei u President ka AJCCTA u la ong ba lada ka seng ka lap ia kino kino ki driver bad trai trok kiba bret pathar ia ki masi iap, ka seng kan sospon syndon ia ki trok jong ki bad kum ka Transporters Association ka don ka bor ban pynduh kamai.
Ha kajuh ka por, u ma Balen Thubru u la iathuh ruh ba ym tang ba kin shah sospon hynrei yn ujor ejahar ruh pyrshah ia ki trai bad driver jong kito ki trok kiba bret pathar ia ki masi iap.
Ka seng ka la kyntu ruh ia ki paidbah ban ai jingtip sha ka seng lada ki lap ia kino kino ki trok kiba bret ia ki masi iap.
Ka AJCCTA ka la maham jur ruh ia kito ki driver kiba ieh ia ki maw ba kah ha surok ha ka por ba ka sniew ka kali jong ki.
“Bun ki driver ki leh khlem akor namar ha kapor ba sniew ka kali jong ki ka sniew, ki kah da u maw ba heh hapdeng surok bad ynda ki la dep ban shna ia ka kali jong ki, ki la shu ieh kumto khlem kynriah”, la ong u ma Balen.
U ma Balen u la ong ba kane ka jingleh khlem akor ki driver ka buh ka jingma bakhraw ia ki kali paidbah kiba iaid ba ieng ha surok.
Maham ka EJDA ia ki Trok Kit Masi: ha ka juh ka por ka East Jaintia Hills Driver Association ruh ka la maham jur ia ki driver kiba kit masi bad bret pathar ia ki masi iap sha rud surok bah.
U Kyntang Phawa, President ka seng u la iathuh ba ka surok naduh na Sonapur shaduh Kuliang ka la sma iwtung kaba shyrkhei namar ba ha baroh shi lynter u surok la shu bret pathar ia ki masi iap da ki trok driver kiba kit masi.
Kumban shu pynkynmaw ba wat ka dorbar shnong Demthring ruh ka la dep ban maham halor kane ha kaba dei bad u surok Jowai-Dawki.
Phi don ban ong eiei?