Na West Khasi, sha Ri Bhoi, sha Jaintia Hills, ujor ka KSU Tang ki kam shah thombor suda, ki nongshong khappud

Shillong, 23 Jymmang:
Ka Khasi Students Union (KSU), ha ka jingleit iakynduh jongka, mynta ka sngi, ia ka kong Roshan Warjri myntri kam poh iing jong ka sorkar Jylla, ha kaba ka seng, ka pynpaw, ia ka jingpyrshah jur jongka, na ka bynta ban buh ia ka ktem jong ka ANVC(B) ha ki bynta jong ka West Khasi Hills. Ka KSU, ka ong ba katei ka jingthmu jong ka sorkar, kan wan rah, ia shibun ki jingjia, ki bym sngew tynnad ha katei ka thain.
Ka KSU, ka sngew lyngngoh ruh, ba kumno ka sorkar, ka leit weng ia ka Kyrshai Police Outpost ha West Khasi Hills, kaba don mar khappud bad ka Assam, kaba dei ban iada ia ki paidbah, na ka jingleh thombor jong ki pulit Assam bad ka KSU, ka dawa namarkata ba ia katei ka rai, dei ban pynsangeh shisyndon bad ba ka kut pulit ha Kyrshai, dei ban pynneh.
Ka KSU, ka pynpaw ruh ia ka jingsngew khia jongka, halor ka jingshah thombor jong ki trai shnong, kiba don ha Moolber, East Jaintia hills bad ha Umtlieh, Ri Bhoi District bad halor kane ka phang, ka Union, ka la ju kren kham mynshwa ruh, ha kaba ka la don ka jingmynjur, na ka bynta ban thaw ia ka kut pulit ha ki jaka khappud bad ka Assam, hynrei, ka long kaba sngewsih, ba haduh mynta, ym shym la pyntreikam satia bad ka Union, ka dawa, ba dei ban buh ia ka kut pulit ha ki jaka khappud bad ka Assam, ban iada na ka jingshah thombor jong ki trai shnong ha katei ka thain.
Ka KSU, ka dawa ruh ia ka sorkar Jylla, ba kan trei tyngeh, ia ki lehnoh Karbi, kiba treikam ha Umtlieh, Ri Bhoi District, kiba dawa pisa jubor na ki trai shnong bad kiba byrthen ban siat iap, lada jia ba kim pynbiang ia ka pisa.
Ka seng, ka khmih lynti, ba ka sorkar kan leh ia kaba dei ban leh, khlem da pynslem shuh, na ka bynta ban ai jingshngain ia ki paidbah, kiba shong ha ki khappud, ong ka shithi, ba la soi da U bah Daniel Khyriem President jong ka KSU bad U bah Auguster Jyrwa General Secretery jong ka seng.
Ka myntri kam pohiing ka jylla ka Kong Roshan Warjri, ka la pynthikna, ba ka sorkar kam pat shym la shim kano kano ka rai ban buh ktem ia ki lehnoh ANVC-B ha Khasi Hills.
“Ka sorkar kam pat

shim kano kano ka rai ban buh ktem ia ki lehnoh ANVC-B bad kan nym leh ia kano kano ka rai pyrshah ia ka mon jong u paidbah”, la ong ka Kong Warjri haba iakren bad ki nongthoh khubor hadien ba la iakynduh ia ki nongialam ka KSU mynta ka sngi ba la ialam da u general secretary u Bah Auguster Jyrwa.
Ka la ong ba ka sngew lyngngoh ia ka jingmih ha ki kot khubor ba ka sorkar ka la dep pruid dak ia ki jaka ban shna ia ka ktem ka ANVC-B ha Aradonga.
“Nga kwah ban pynthikna hangne ba ngim pat pruid dak eiei hangno hangno ruh na ka bynta kane ka jingthmu”, la ong ka Kong Warjri. Shwa ia kane hadien ba la iakynduh ia ka myntri, u Bah Jyrwa u la ong ba ka KSU ka pyrshah jur ia ka jingthmu ka sorkar ban buh ia ka ktem ia ka ANVC-B ha West Khasi Hills bad ha South West Khasi Hills district.
U general secretary ka KSU u la ong ba ka jingthmu ka long pyrshah ia ki paidbah bad kan nym wanrah ia ka jinglong jingman kaba suk namar ki kam sniew ba har rukom kin wan lada ai lad. Halor kanek ka seng ka dawa ba ka sorkar ka dei ban kynran dien na kane ka jingthmu.
Ka tnad pohiing ka jylla kham mynshwa,ka la bthah ia ki Deputy commissioner ka South West Khasi Hills bad North Garo Hills ban wad jaka ban buh ktem ia ki ANVC-B.
Dang shen, ka bor synshar ka South West Khasi Hills District ka la iathuh ia ka sorkar ba kam shym la ioh jaka na ka bynta kane ka jingthmu.