Na u niang ryndia, kamai ka longing ha Mawduh, T.1lak shisnem, ha ki nongkhwai, lei ki khliehdor haduh T.1,500 shi kilo

Mawduh:Ha ka jingleit peit ia ka jaka rep jong U Bah Spingwell Kharmashra, la iohi ruh ia ki niang ryndia ba ki ri, ha katei ka jaka rep jongki.

Ha ka jingleit peit ia kawei ka kamra rit, la lap ia ki spah tylli ki niang ryndia, kiba dang ri dang sumar.

Ka kong Lucy Iawren, kaba don 55 snem ka rta bad kaba dei ka kurim jong U bah Spingwell, ka iathuh, ba ki la ri, la lai bnai ia kitei ki khniang bad sa tang shi taiew, ki la long ban bam bad shisien ri, ka iathuh, ba ki ju pynmih haduh 80 kilo antad bad ki ri 4 sien ha ka shisnem. Ka kong Lucy, ka iathuh, ba ka por kaba utei u khniang u iaid iew bha, ka dei ha u bnai Jylliew, Naitung, ha kaba ki ju die T.500 shi kilo bad haba khein antad, ki pynmih ia utei u khniang, kumba 250 kilo shisnem lane kaba ki kamai kumba T.1lak tang na utei u khniang bad u tei u khniang, u dei u bym don jinglut eiei ruh em, namar ba u sla uba u bam utei u khniang ruh, u dei uba ki thung bad ia utei u khniang ruh, la kha da ka thapbalieh. “Mynta ba la mih bun ki khniang na thain Maweit, thain Riangdo, la kham tad, hynrei ha u June, July, te ka dor u khniang, ka long beit T.500” ong ka kong Lucy.

Na ka liang jong U bah Kharmashra, u iathuh ba utei u khniang u sang shibun ia ki briew, kiba tah ia ki jingtah iewbih bad kumta kim ju shah, ba kin rung sha katei ka jaka ri khniang bad nangta, haba leit iap briew ruh, ki dei ban sum ban sait shwa ialade bad ki sa leit peit ia kitei ki khniang; katba ia ka dor pat U Bah Sping, u iathuh, ba haba la kwah khniang lei ki nongkhwai, kim ju ia am dor satia, hynrei ki dang thied haduh T.1,500 ne T.2,000 shi kilo ia u khniang ryndia, na ka bynta ban leit khwai.