Na u myntri pohiing,DGP, dawa u MLA ban pyllait ia U Rangbah Shnong

Nongpoh:U Bah Sosthenes Sohtun, MLA Jirang, u la ong ba tang mar ia tip ba u Bah Manason Doloi, Sordar Warmawsaw, u la shah rahbor ha ki suba runar na Assam, u la shimkhia ban pyntip sha u Myntri kam Pohiing bad DGP ka Meghalaya, ba kin shimkhia ha ka ban wad ia u Sordar Warmawsaw, uba la shah rahbor hynnin ka miet.

Ka jingpyntip sha kitei ki heh kiba peit ia ka shongsuk shongsain hapoh ka jylla, ka long ban kyntu ia ki ba ki dei ban pyntip bad ban iatreilang bad ki Pulit ka jylla Assam, khnang ban lap noh kloi ia utei u Sordar Warmawsaw.
Haba iadei bad katei ka jingjia shah rahbor u Sordar Warmawsaw, u MLA Jirang, u la ong ba kum u Nongmihkhmat ka thain, u pynrem jur halor katei ka jingjia, namar haba don kum kitei ki jingjia shah rahbor, kan pynsyier ia ki paidbah bad kan ktah ruh wat ia ka shongsuk shongsain ki paidbah ha katei ka thain, kaba dei ruh ka thain kaba don ha khappud ka Meghalaya-Assam.