Na U myntri DoNER, dawa U Mukul da ka IIPH ha Meghalaya

Shillong, 4 K’lyngkot:
U Myntri Rangbah ka jylla u Mukul Sangma ha kane ka sngi Thohdieng u la dawa na u Myntri tnad DoNER ka ri uba dei ruh u Chairman ka North Eastern Council (NEC), u Jitendra Singh ban pyrkhat lem ban iarap ia ka jingthmu ka sorkar ban buh ia ka Indian Institute of Public Health (IIPH) ha Meghalaya.
Haba kren ha ka jingialang ba 63 jong ka NEC Plenary Meet ha Shillong, u Sangma u la ong ba ka jingthmu ka IIPH kan long lyngba ka jingiatreilang hapdeng ka sorkar pdeng bad ka sorkar jylla bad ka tnad Health & Family Welfare bad ka Public Health Foundation of India (PHFl).
U la iathuh ba ka sorkar jylla ka la dep pynap ia ka jaka kaba heh 22.3 akar ban buh ia ka IIPH. Lyngba ka jingdon ka IIPH kan iarap ban pynbha ia ka koit ka khiah jong ki paidbah kane ka thain.
“Haba ka jaka pule kan dap pura 10 snem, ka thmu ban ai ia ka jinghikai ia ki samla 500 ngut man u snem ha ka kyrdan diploma, degree bad master degree”, la ong u Sangma bad bynrap ba ka snem ba nyngkong ka thong ka long ban pdiang shwa 200 ngut ki samla pule.