Na u Lei Shyllong pan jingiada ka Seng Khasi ban lait na ka khlam COVID-19

Shillong: Ka Seng Khasi Kmie, Shillong, myn hynnin ka sngi, ka la kiew pat sa sha u Lum Shyllong ban pynlong ia ka nguh ka dem khnang ban pan ia ka jingiada na u ‘Lei Shyllong, uba long uwei na ki Ryngkew ki Basa jong ka Ri bad jaid bynriew ba un un ker un da un ri un sumar ia ka it ka hima bad ia ka jaidbynriew Hynniewtrep hi baroh kawei ba kan lait na ka jingwan ban lyngshop jong ka khlam jingpang ka Covod:19 ne Coronavirus.

Ia kane ka nguh ka dem ba la pynlong la ia donlang ruh da u Syiem ka Hima Mylliem, u Pa’iem Ainam Manik Syiem. U Rgh Skor Jala, ba dei u Chairman jong ka Komiti U Tymmen U San, ryngkat u Rgh Donbokstar Kurkalang ki la pyndep ia ka nguh ka dem ka duwai ka phirat ha ka jing iadonlang bad sakhi ruh da u President ka Seng Khasi Kmie u Rgh Don Kupar Dkhar, bad u Chairman ka Lum Sohpetbneng Committee Seng Khasi Kmie u Rgh Dipshon L. Nongbri.
Ka jingleit ban pynlong ka Seng Khasi Kmie ia ka nguh ka dem ha u Lum Shyllong ka dei hadien ba ka la dep ba kan pan jingbit na u Pa’iem Ainam Syiem, kaba la wan hadien ba ka la pyndem ia ka nguh ka dem ha kliar u Lum Sohpetbneng ba kyntang ha ka 24 tarik u bnai Lber bad ruh shi sngi hadien ba ka Seng ka la dep ba kan pynlong ia ka nguh ka dem ka dwai ka phirat ha iing seng Khasi, kaba la long hynnin ka sngi.
Ka nguh ka dem na u Tymmen U San ka long ba la ud la nam ha u ‘Lei Shyllong’ bad kumjuh ha u Blei Trai Kynrad, ba ha kum kane ka por jong ka jingsaphriang ka khlam ka ngoh, ba ki bor blei kin iarap ha kaban ri ban ker ban da bad ban sumar ia baroh lang khlem da niew da tang ia ki niam ki rukom, pynban ha kum kane ki por jong ka saw ka sian kaba ka pyrthei hi shityllup ka mad shisha ia ka jingeh, ba ki bor blei ba maian ba kin ri kin ker kin da kin sumar ia kane ka khlam ka ngoh ba kam dei ba kan ioh ba kan wan ban saphriang ha kane ka bri hynniewtrep, kaba da ka bor ba maian blei, kin pyndem pynthiah ne ban pynher krad na kane ka sla jong ka pyrthei.
Hadien ba la dep ka nguh ka dem, na ki dak ki shin kiba la paw, ka kren shai kdar ba ka bor blei ki ai ia ki dak ki shin jong ka jingkyrshan lem ka jong ki ban ban ri ban ker ban da ban sumar.