Na U Lat tynruh ka BJYM ban pynbeit baibam na u Aadhar

Shillong, 18 Nailar:
Ka tnad samla ka BJP ka Bharatiya Janata Yuva Morcha (BJYM) Meghalaya ka la tynruh na ka shuki jong u Lat ka jylla ban dawa tuklar ban pynbeit ia ka kynrum kynram kaba mih ha ka jingpan Aadhaar ka sorkar ia ki samla pule ban ioh baibam jong u snem 2016-17.
U President ka BJYM u Bah Egenstar Kurkalang haba kren sha ki nongthoh khubor mynta ka sngi u la ong ba ka seng ka kyntu ia u Lat ka jylla ban tuklar bad ka sorkar pdeng ban pynlait ia ki samla pule na ka jylla Meghalaya na u Aadhaar.
U la ong ba ha ka dorkhas ba la phah ruh sha ka University Grants Commission (UGC) la kyrpad ban pynlait noh ia ka Meghalaya na u Aadhaar na ka  bynta ban ioh baibam kaba dei jong u snem 2016-17.
“Ngi la ioh pdiang ia ka jingud jong ki samla pule bad ngi sngew lyng ngoh ba ka sorkar jylla kam shym la leh eiei halor kane ka bynta kaba pyn kulmar bad ktah ia ki samla pule”, la ong ka BJYM.
U la ong ba ka sorkar Assam ka la dep kyrpad na ka sorkar pdeng ha kaban pynlait noh ia u Aadhaar na ka bynta ban ioh baibam ki samla pule namar ba ka sngewthuh ia ka jingeh hynrei kaba lyngngoh ka long ba ka sorkar Meghalaya ka sngap man man bad kam shym la kren eiei sha ka sorkar pdeng.
U la  ong ba ka BJYM ka la ai jingmut ia ki samla pule ban leit iakren bad ki bor sorkar jylla hynrei kaba lyngngoh ka long ba ka jubab ba ki ioh ka long khlem ioh jubab eiei kaba sngew tynnad halor kane kakam.
“Lada ka sorkar jylla kam sngap ia ki jingeh jong ki samla pule, kan long kaba sngewsih ioh ba ki samla pule kin duh pynban ia ka baibam jong ki”, u la ong.