‘Na shuki ruh um hiar, ka jingeh ruh um weng’

Shillong, 08 Jylliew:
Ka Hill State People’s Democratic Party (HSPDP) ka pynpaw ia ka jingsngew lyngngoh ka jong ka halor ka jingkren jong u Bah Ronnie V Lyngdoh, MLA uba la ong ba ka jingiatreilang hapdeng ka UDP bad HSPDP kam don satia ïa ka nongrim bad ka thong.
Ha ka kyrwoh ba la phah lyngba ka Media Cell jong ka party, ka seng HSPDP ka buh jingkylli, “U Bah Ronnie u tip aiu shaphang ka nongrim bad ka thong jong kane ka jingiateh paralok? Ngim donkam ban pynshai ia u Bah Ronnie halor kano ka nongrim ba ngi iatreilang, hynrei ia ka nongrim ba ngi iatreilang ngin sa pynshai sha u paidbah ynda la dei ka por”.
Haba pynshai halor ka jingkynthoh jong u Bah Ronnie ba ki don ki politishian kiba buaid bor, ka seng ka don ban ong tang katne, “Hato ym dei u Bah Ronnie uba la kren kop ba un hiar shuki noh lada ka MUDA ka kyntur pud sha Mylliem? Hynrei haduh mynne mynta katei ka jingeh um pat lah ban weng bad na ka shuki ruh um treh ban hiar”.
“Sa bishar ma phi ki paidbah mano ba buaid bor”.
Ka seng ka kwah ban ong ba kane ka jingiatreilang ka long ka jingangngnud jong u paidbah ban wanrah pat ia ka jingkylla ha ka jylla ia kaba ki paidbah kila angngud baroh shi katta.