Na sem Masi ban leit sha jingialang U Modi

Shillong, 27 Jymmang:
Ka jingbym ler ka rukom pyniaid jong ka sorkar jylla ia ki paidbah ban leit sha ka jingialang jong u Myntri Rangbahduh ka ri u Narendra Modi mynta ka sngi ha Polo, ka la pynlong ia kiba bun ki paidbah ban thnum bad iakynduh jingeh namar ba ki hap ban iaid tawiar shabar ka JN stadium bad iathngian na jingkhang kaba don tang kawei.
Ka CSWO ka la pynrem jur ia ka tnad pulit ia ka rukom pyniaid ia ki paidbah ban leit sha ka jingialang jong u Myntri Rangbahduh ka ri. “Ki paidbah ki hap ban iaid shabar ka stadium, bad sha sem masi jong ki briew hapdeng ka jingktieh tang ban poi sha ka jaka ba don u MyntriRangbahduh ka ri”, la ong ka President ka CSWO ka Kong Agnes Kharshiing.
Kane ka jingleh ka sorkar ka pyni ia ka jinglong jong ki shakri sorkar kiba iadei bad ki politishian ym ban shakri ia ki paidbah, la ong ka CSWO.
Kaba kham sngew ngiah na ki paidbah ka long hadien ba la dep peit bad twad ia ki pla jong ki briew, la bthah ban buh pat shabar bad kane ka la jia ruh ia ki khynnah skul kiba wan na skul bad ka pla jongki.
“Wat ia ka shatri ruh ym shah ban rah, la phah buh shabar’, la ong ka Kharshiing bad bun ki tiar jong ki briew ki la jah hadien ba ki la leit wad na jaka ba phah buh ki pulit. Ka CSWO ka la dawa ban pynlong ia ka jingtohkit ia kane ka jingleh tad dor jong ka sorkar jylla, ha kaba wad ia ki pla jong ki khynnah ruh ym shah ban rah haba ki kwah ban leit sngap ia u Myntri Rangbahduh ka ri.
“Ka jingialeh politik jong ki pulit, da kaba pyndik ia ki khynnah bad ki paidbah, dei ban pynlong da ka jingtohkit”, la ong ka Kong Agnes.