Na phyllaw iing, nga pynshang sawdong ki khmat ban peit ia ki shnong ba marjan, ba markhap

La tap biang u lyoh tangba um dei u lyoh slap. Ka lyer ruh ka beh ba u ‘nai Lber, u ieng ha jingkhang ban khublei ia ngi u khunbynriew lada ngi dang kynmaw ia ki saw aiom bad ki 13 bnai jong ka snem.

Nga peit sepngi sha Nongmensong, ka jngut thui thui bad ka law Khyriem, long kumba tap khmat da ka jain iohi lyngba hynrei, ym shai khliak khliak ka dur, ka rong. Iohi syrwut syrwet. Sha Lum Shulong, nga phnieng ki khmat, phewse, ym iohi shuh, kynthup ia ka Malki, Lumparing, Lawsohtun, Mawblei, Laitkor, ter ter. I kumba lah niad da ka rong lieh bthuh, ym kaba lieh kum ka shun, kum ka ior. Shaphang shatei-sepngi, sha ki thain Nongmadan, Kreit, Mawmih, long kumba peit sha Lum Shulong.
Nga kkmied sha jrong sha suin bneng, kata, na jaka shong, ka khuid wat la u lyoh kit um jynhaw ba syrtap bad uba rong iong bthuh, u la sdang ban king shathie ban leit shatei.

Sngew ioh mynsiem ba ka CSWO ka la shim khia ia ka jinglap ia ki jingpyntrei thang dewiong ban ioh rnga dewiong (coke) khnang ban die ioh peisa, ioh spah ioh phew katba ka ktah pat ia ki nongshong shnong ha ka ring mynsiem, ha ka koit ka khiah, kynthup ia kito kiba wan kamai im jakpoh namar ki lei, ki hap ring mynsiem hangto hangto syndait bad ki shawla thang dewiong. Kumba ktah ka jingtih uranium, ktah ka tdem dewiong nyngkong eh ia kiba thang bad ia kiba shong ba sah ba leit ba wan bad buhai shnong shata hi. Kumjuh ka tdem thang mawshun ryngkat bad ka jingsma.

Ki kynting shajrong bad shang sawdong bad mynta, ki par shane bad shatai namar ym lah ban buh pud ia ki bad ki rung kat shaba ki thliew ki syar bad shapoh um de.
Ai khublei ia ka MPSCB kaba la leit swar hangne hangtai ban lap ia ka jingshisha. Ia ki katto katne ki sengbha lang, ki shnong ki thaw kiba shim khia halor ka jingkylla bih ka lyer ring mynsiem ba jngi sum khlieh sha ki phud ki wah, ki nan um bad ngam shapoh khyndew bad sa ktah ia ki jingthung jingtep.

Hynrei, ka donkam ka jingiatrei lang jong baroh, ka jingiatylli ban jop ia ki bor pynsniew mariang.

Nga ieh haphi ki paralok jong ki lad pathai khubor ban pynphriang bad nang lum nang tih thai halor kane phang kaba long ka jingialeh pyrshah ia ka jingsniew mariang (combating climate change) la ka dei ban kyntu ia ki bor sorkar, ki shnong ki thaw, ki it ki hima, ki karkhana, ki seng, ki kynhun bapher bapher.

To ngin pyrshang pyntrei ia ka COP21 kaba dei ka Paris Agreement on Climate Change.
Khublei.
P. B. M. Basaiawmoit