Na Nagaon Assam, ioh pyllait ki pulit ia u khynnah ba shah rahbor ha ki runar

Nongpoh: Mynta ka step ha ka por 4 baje ei ei mynstep, ki Pulit ka Nongpoh Police Station, ki la ioh ban pyllait im noh ia uwei u khynnah ba dang 16 snem ka rta, uba la shah rahbor na Nongpoh hynnin ka sngi u Blei ha ka por 9 baje ei ei mynstep, kiba la shim kabu halor ka jingbym don briew hapoh katei ka iing.

Ia utei u khynnah, la ioh ban pyllait na harud surok jong kawei ka jaka kaba la tip kum ka Dobaka (Nogaon), kaba dei ruh ka por kaba kitei ki runar ki la thmu ban pynkynriah noh ia utei u khynnah sha kawei pat ka jaka.

Haba batai halor katei ka jingshah rahbor ia utei u khynnah, ki Pulit ki la iathuh ba ki la ioh jingtip haduh ka por 9 baje eiei janmiet, kata hadien ba kiba haiing jong utei u khynnah, ki la wan pyntip sha ki Pulit, ba u tei u khynnah u la shah rahbor ha ki runar bad kiba la dawa ruh haduh T. 10 lak na ka bynta ba pyllait ia u khlem pynmynsaw.

Shuh shuh, la iathuh ruh ba ha kaba nyngkong, kiba ha iing jong utei u khynnah, ki shym la poi pyrkhat ba utei u khynnah u la shah rahbor, namar naduh katei ka por 9 baje mynstep ki la iai ap ia u, pynban kaba la pynthikna halor ka jingshah rahbor ka dei hadien ba utei u runar uba la rahbor, u la phun sha u kpa jong da kaba dawa ruh haduh T. 10 Lak.
Ka khubor na ki Pulit, ka iathuh ruh ba tang mar iatip halor katei ka jingshah rahbor utei u khynnah, mar mar ki la wad jingtip khnang ban lap bad ban ioh pyllait im ia utei u khynnah.
Ha kaba nyngkong, ki Pulit ki la leit ban khynra ha ki thain Sumer ha Ri Bhoi, namar katkum ka jaka kaba la batai na ka phun jong utei u runar ka don ha katei ka jaka, hynrei tang khyndiat por pat la batai ba u don ha ka thain Dobaka (Nogaon) bad kaba la pynlong ia ki Pulit ba kin leit mar mar sha katei ka jaka, khnang ban lap ia utei u khynnah.
Dei tad ha ka por 4 baje ei ei mynstep, ba ki Pulit ka Nongpoh ki la poi ha katei ka jaka bad ki la iohi ia arngut ki briew lem bad utei u khynnah 16 snem, kiba la ieng harud surok, ha kaba ki Pulit ki la ioh ia utei u khynnah bad kem ruh ia u Md. Samsudeen Ali na Nagaon, Assam, hynrei utei u paralok jong u uba la donlang ha katei ka por, u la lait da ka said na kti ki Pulit.
Haba iadei bad katei ka jingjia shah rahbor, na ka liang ki Pulit kin dang pynlong ia ka jingtohkit kaba jur, khnang ban lap ia baroh ki jingshisha bad kiba la donkti ha katei ka kam runar.