Shillong:Halor ka jingjaboh ka lyer ha ka Shnong Byrnihat, u bah GH Chyrmang, u Member Secretary, ka Meghalaya Pollution Control Board (MSPCB), u la iathuh ba ka Board hi ka ju shimkhia ban leit jurip man ka por ia kane ka thaiñ, hynrei ka jingeh ka long ba ka board ka ju pynshitom bad daiñ kuna ia ki karkhana ha ka Jylla Meghalaya, hynrei ki karkhana na Assam pat ki bteng ban dang pynjaboh ia ka lyer.
Lah ban kdew hangne ba hadien ba ioh ia ka kaiphot jong ka IQAir World Air Quality Report 2024, kaba la kdew ba ka Byrnihat ka dei ka shnong kaba jakhlia tam ka lyer.
Haba kren sha ki lad pathai khubor u bah GH Charmang, u la ong ba ka jingjurip ia ka Byrnihat kam dei kaba thymmai, na ki por sha ki por hi la ju pynlong ia kane ka jingjurip bad kumba ka mih ha kine ki sngi ba ka dei ka shnong kaba jaboh tam ka lyer ha ka pyrthei, kato ka jingkhein kam dei na ka Jylla Meghalaya, hynrei ka dei katkum ka Air monitoring station kaba don ha Assam.
“Hangne ngam kwah ban kynthoh ia ka Assam ne Meghalaya hynrei kaei kaba nga kwah kdew ka long ba ia ka lyer ym lah ban khang, kat kum ka kaiphot Jong ka National Environmental Research Institute (NERI) ka la pynpaw ba ka jingjaboh hi ka lyer kam dei tang na ki karkhana hynrei na ki Surok, ki Karkhana, ki kali, ki jingthang khlaw bad kiwei kiwei” u la ong.
“Ngi la iohi ha ki ladpathai khubor ruh ba ka Assam ruh ka la sdang ban jurip ia kane da ka jingshimkhia u Myntri Rangbah ka Jylla Meghalaya bad kane ngi sngewtynnad namar la long ba leh beiñ ia ki karkhana ha ka Jylla la jong. Namar ia ki Karkhana ha ka Jylla, ngi pynshitom, ngi daiñ kuna bad kiwei kiwei hynrei na ka Assam pat ka jingpynjakhlia ka bteng beit, kumta ka long kaba sngewtynnad ba baroh ar Jylla kin shimkhia ia kane” u la bynrap.
U bah Chyrmang u la ong ruh “Kumba na ka liang u Myntri Rangbah u la shimkhia ban thoh sha Assam te ngi khmih lynti ban lah ban pynbha ia kane bad na ka liang jongngi ruh ngi la thoh sha ka Central Pollution Control Board (CPCB) bad phah ruh da ka jingthoh sha ka Assam, hynrei ngim pat ioh ka jubab na ka Assam”.
U la iathuh ba ka jingkwah hi ka Board ka long ban thaw da ka kynhun ka ban don hapdeng ka Assam bad Meghalaya khnang ban ioh ban iamir jingmut ban weng ia kane ka jingeh.Kumba ka long mynta hi ka Board kam pat ioh kano kano ka jubab halor kane bad ka kaiphot ruh ym pat pyndep kumta, ym pat lah ban aiti sha ka sorkar.
Ha kaba ia dei bad ka MSPCB hi ka don ka jingduna ki nongtrei, lada peit ha kiwei kiwei ki Jylla ki nongtrei ka board ki don ia u District officer, hynrei ha Meghalaya hap ban pyniaid kam hi na kane ka ophis la ki dei sha kano sha kano ka thain ruh namar ym don district office.
“Ngi la pan ki jaka namar ngi donkam ban don sha kato ka thain hynrei ngim pat ioh ka jubab bad ka jingbym ki district officer ruh ka lah ban long ba ka don ka jingdkoh ha ka rukom trei kam ka Board” u la ong.
“Ngi khmih lynti na ka tnad Industry ba kan sngap lang ia kane ka jingdonkam jong ka Board bad lada dei i mat iba rit ki ju don ia ki Environmental Engineer, hynrei lada dei ia ka mat kaba heh kum ka Byrnihat ngin hap ban tang uwei u briew ngin ym lah kumta ngi la thaw da ka Task Force ka ban don lang ki official na kiwei ki district ruh ban leh ia ka inspection”.
Phi don ban ong eiei?