Na Laitlyngkot sha Nongkynrih, maramot ki nongniah Taxi ia ka surok

Shillong,23 Naitung:
Ka seng ki nongniah Taxi kamai hapoh ka lama jong ka Local Taxi Owner and driver Association, Laitlyngkot Unit mynta ka sngi, ki la ia mih khrui ban maramot noh dalade hi ia ka surok kaba la sniew palat, ha kaba ki la sdang ia katei ka jingmaramot na Lad Iew Laitlyngkot ter ter shaduh Nongkynrih.
Ha katei ka sngi ba baroh ki ki nongniah bad ki trai Taxi ki la sangeh ka kamai kali ban maramot surok, la ia donlang ruh u MLA ka Sohra Konstitwensi u Bah Titos Chyne ha ryngkat ka jingiadonlang u President katei ka seng u Bah Ryngkatlang Lyndem, General Secretary Bah Willfling Shabong bad kiwei pat ki dkhot.
Ka surok na Laitlyngkot khamtam lei lei shuwa ban poi sha Nongkynrih, ka long kaba la sniew palat haduh katta katta bad kaba la wanrah jingeh ia ki kali ban iaid ha kum kitei ki surok kiba la dap tang da ki thliew ki syar suda, ha kaba la pynlong ia katei ka seng ban ym lah shah ban shu peit kumto ia kat kate ka jingsniew ka surok hynrei kaba la kloi ban ia mih ryntih ban maramot bad ban pyndap khyndew bad maw ha ki thliew ki syar ha shilynter ka surok.
Kum u MLA jong ka thain u Bah Titos u la ai mynsiem bad ai jingiaroh ia katei ka Association ki Local Taxi , kiba la kloi ban ia mih ryntih dalade hi ban leh ia kaei kaba ki donkam.