Na ktem khalai ioh tam met iap ki pulit Nongpoh

Nohpoh 18 Risaw:
Ki pulit jong ka Nongpoh Police Station ha kane ka sngi u Blei ki la ioh tam ia ka met iap na kawei ka ktem iakhalai kaba don ha Lumsohphoh kaba don hajan surokbah NH-40 ha Nongpoh.
Ia kane ka met iap ba la suba ba shah pyniap la ithuh kyrteng kum u Rama Koch (30) uba dei na Iewmawlong, Ri Bhoi District.
Na ka liang ki pulit kim pat lah ban ong la u shah pyniap ne u iap hi ne na kano kano ka daw hynrei ki don ki dak mong na ka bynta ka ka khlieh jongu bad ka jingtohkit ka dang iaid. Ia ka met jongu, la rah sha  Civil Hospital Nongpoh ban leh ia ka post mortem.
Kane ka jaka ka Lumsohphoh ka dei ka ktem iakhalai, bad kiwei ki kam isih jong ka imlang sahlang.
Ki briew jong katei ka thain ki la ong ba ka bor shnong ka la dei ban leh eiei ban tem ia ki kam bymman kiba kynrei ha kane ka jaka.