Shillong: Ka Khun Hynniewtrep National Awakening Movement (KHNAM) ka la pyllong ia ka jingkhynra ia ki briew kiba trei bylla ha ka jingshna ia ka ing ophis ka tnad ka sorkar India ka GCI ha Rynjah, Shillong.
Ha ka jingkhynra mynta ka sngi, ka KHNAM ba la don lang ki ophisar ka Khasi Hills Autonomous District Council (KHADC), ki la lap ba ki don bun bah ki nongbylla bar jylla, ki bym don ki kot ki sla kum ka Labour License, EPIC bad kiwei ki kot ban pynshisha kum ki nongshong shnong ka India.
“Ki nongtrei bylla da ki spah hynrei kiba don Labour License tang 5 ngut”, la ong u Bah Thomas Passah u president ka KHNAM Youth Wing. Ha ka jingkhynra, la lap ba 51 ngut ki don ka EPIC, 34 ngut kim don. Hynrei la iathuh ba kine ki dkhar kiba ioh iaka Labour License ki hap siew T.1500 kaba shong dor tang T.700.
Ia kane ka jingtei la shna da u kontraktor u Rocky Dhar, uba dei u para u myntri sorkar u Bah Sniawbhalang Dhar, kaba la sdang pyntrei naduh u snem 2016.
U Bah Thomas u la kynnoh ba kane ka jingioh ki briew ban wan bylla sha kane jaka khlem ki kot ki sla, ka dei ka jingleh sting ka KHADC, bad u la ong ba ka jingioh bylla sahuh ki briew nabar, ka la pynduh kam ia ki samla lajong ha kane ka jylla. “Shwa ba ngin wan, ngi la wan surbe shwa ia katei ka jaka lai sngi mynshwa bad ngi la wan lang mynta bad ki pulit enforcement ka KHADC”, u la ong.
U la ong ba ka KHADC kam dei shuh ban ai wai ban ai labour license namar ba kane kan pynshlur ia u nongshim wai ban shu ai pathar tang ban kamai, kaban buh jingma pat ia ka jaitbynriew na ka jingwan rung ki briew nabar. U la ong ba ka la don ruh ka jingkamai spah da mano re ia ka jingdie ia ka labour license namar ba kaba shong dor T.700 lah die haduh T.1500 kawei.
“Da ki spah ngut kim don ka Labour License, kane ka jingioh trei lailan, ka buh jingma ia ka jingwan buhai shnong khamram haba pyntreikam ia ka Assam ia ka National Register of Citizen (NRC) bad kane ka dei ka jingbym ler ka KHADC ha ki bnai ba la dep bad mynta ka la don ka jingshim khia ha kine ki khyndait bnai”, u la ong.
U la ong ba ia kito ki bym don kikot ki sla, ki dei ban ioh shwa ia ka Labour License na ka Council bad lada kim leh, ki dei ban leh ia kaba donkam ban pyntip sha ki pulit.
U la ong ba kumba ka paw, ka la don ka jingleh kam khaii ia ka labour license ha kaba ki bar jylla, ki hap siew haduh T.1500 kaba shong dor tang T.700 bad ka la don ka jingleh benami bad ka KHADC ka dei ban leh ia kaba donkam halor kane.