Tura: U Conrad K Sangma, myntri rangbah ka Meghalaya, ula ther tyngeh ia U Mukul Sangma, ha kaba ula pyntrei kam ia ki skhim bapher ha ka Jylla bad kiba shu bam kruin ia ka pisa jong ka Jylla bad ula ong ba ula pynmih ia ka skhim jong ki dieng agar bad ka shim siej, khlem da don kano kano ka jingwad bniah bad ka jingtip ia ka sap jong ki nongrep.
“U wan rah ia shibun ki mishon ha ka Jylla bad kaba la pynmih ia ka jinglut phut kaba jur jong ka pisa bad um ju sngap ia ka jingai jingmut jong ki nongtrei sorkar bad kumta ki prokram ki la pheil lut khoit” ong U Conrad, ha ka jingialang kanbas paidbah na bynta ka Agatha Sangma, ha Resubelpara ha North Garo Hills. “Wat la ngim kwah ban kynnoh ia U Mukul, hynrei ki paidbah kin sa tip shen ia ki kam bymman jongu bad ki jingpyniaid bakla ia ka pisa, lyngba ka jingkhwan lalot jongu shimet” ong U Conrad.
U Conrad, u iathuh ruh ba haba u leit sha Delhi ban iakynduh ia ki myntri sorkar bapher bad haba ki briew ki tip ba u dei khun jong U PA Sangma, kim ju pynap slem satia bad ki khot noh mar mar. “Ha Delhi, kim sngap satia ki nongialam bapher, hynrei haba ki tip ba nga dei u khun jong U PA Sangma, nga long uba ki niew burom bad nga kren ia kane, namar ba ki riew sain pyrthei kiba khraw ruh ki burom ia U PA Sangma” ong U Conrad.
U Conrad, ula ong shuh shuh “Lada ngi jied ia u briew, u bym don ba ithuh ban leit sha Delhi, kan dei ka jingduh ia u paidlang ka Garo Hills, hynrei lada jia ia ka Agatha, ki riew sain pyrthei kiba don ha ki seng bapher, kin niew burom ia ka bad kin sngap ia ki jingkren jongka” ong U Conrad bad u ong shuh shuh ba u paidlang ka Garo Hills, ula ju trei bor bah, na bynta ka NPP bad u ong “Ha ki por ba ngi don ha ka jingeh kaba khraw, ngi jop ia ka elekshon MP, mynta ka NPP, ka don ha ka sorkar bad ngam iohi ba ki paidbah, kin dang artatien”.
Phi don ban ong eiei?