Na ki hajar tylli ki Han ba her ha suin ha shnong Klew, ioh ki paidbah ia kawei ba hap ha pynthor kba

Nongpoh, 28 Risaw: Mynha ka miet 25 tarik mynta u Bnai, ki paidbah ha ka shnong Klew, ka shnong kaba don ha Raid Madan Kyrdem, Ri Bhoi, ki la sngewphylla eh na ka sur kaba ki la iohsngew ia ka sur ba pah ki kynja Han kiba her ha sahit bneng bad kaba la pynduh thiah pynduh dem ia ki briew hapoh katei ka shnong.
Ha kaba nyngkong, ki paidbah na katei ka shnong, kim shym la tip satia ba kitei kiba pah ki dei kiei bad ki jait sim aiu, hynrei ki la tip tad haduh ba ki la lap ia kawei ka kynja Han na pynthor Kba, ia kaba ki briew na katei ka shnong, ki la suba ba katei ka Han kaba ki la lap, ka dei kaba la hap ha kitei ki Han kiba her ha sahit bneng, namar na kaba la lap da ki paidbah ia katei ka Han, ka long ba ka pher shibun eh haba ianujor bad ki Han kiba don ha ryngkew.
Haba batai halor katei ka jinglap ia katei ka Han, u Bah Lamburom Masharing, rangbah shnong Klew, u la ong ba ha kaba nyngkong, ki paidbah kim shym la poi pyrkhat halor katei ka jingwan poi Han kiba her ha sahit bneng, hynrei ki paidbah ki la tip ba dei ki Han, ka dei hadien ba ki la iohsngew ia kawei ka kynja sim kaba pah beit khlem sangeh ha kawei ka pynthor kba bad kumta haba ki la leit peit, ki la lap pynban ia ka Han bad kaba ki la sngewphylla eh ba ki la lap ia katei ka Han, namar kam dei kaba ju don hapoh katei ka shnong.
U la ong ruh, watla da ki hajar tylli kiba her ha sahit bneng, hynrei kiwei ki la ioh ban her sha ka jaka kaba ki thmu, pynban tang katei kawei ka Han, kaba la hap noh hapoh ka pynthor kba, kam shym la lah shuh ban her sha suin kumba her kitei kiwei ki Han bad halor katei ka Han kaba ki la ioh kem, ka shnong kan sa leit ban aiti noh sha tnat Wildlife.