Na ki ain khang mynder, thoh ki 13 seng sha U MR

Shillong, 14 Naitung:
Ki 13 sengbha lang ki la phah da ka jingthoh sha u myntri rangbah ka jylla u Dr.Mukul Sangma ba u dei ban khot ia kren noh ia ki ban tip ia ka jingiaid lynti ki aiñ pyrkhing mynder kiba ki sengbhalang ki ia kren bad ka sorkar.
Ha katei ka jingthoh ba la soi da u samla Daniel Khyriem, President KSU, bah Joe Marweiñ President FKJGP bad u bah Sadon Blah, General Secretary HNYF ki la pynpaw ha u myntri rangbah ia ka jingleh suk palat ka sorkar ban pyntreikam ia ki lai tylli ki aiñ kata ka Entry and Exit Point, ka Tenants Verification and Regulation Bill bad ka Amendment of Benami Transaction, Detection and Prohibition Bill wat hadien ba ki sengbhalang ki la ap la slem bah.
Ki la pan jingshai ruh na ka sorkar halor kitei ki lai tylli ki mat kaba kynthup ia ka ripod jong ka Entry and Exit Point kaba la phah sha ka Social impact Assesment (SIA) ban pynshai kumno ka la long mynta.
Ki la pan jingshai ia ka jingphah jong ka sorkar ia ka Tenent Verification and Regulation Bill sha ka Select Committee ka Meghalaya Legislative Assembly namarba ki la ong ba katkum ka jingtip jong ki kam pat don kawei ruh ka jingialang ban ia mir shaphang katei ka mat bad ki la pan jingshai balei ka Select Committee ka pynslem ban lum jingialang. Ki la pan jingshai kumno ka Amendment of Benami Transaction Detection and Prohibition Bill ka long mynta.