Na ki 29 lak ngut tam ki nongshong shnong, 85 hajar tam ba leh NPR

Shillong, 13 Lber:
Wat la ka la don ka jingpyrshah kaba jur na ki sengbhalang khamtam na ka KSU ban pyntreikam ia ka National Population Register (NPR) ha kane ka jylla, hynrei ka jingpyntreikam ka la iaid shaid shaid haduh kine khamtam sha ki jaka nongkyndong.
Kat kum ka jingkhein na ka tnad General Administration Departement (GAD) ki la don haduh 85, 690 ngut ki briew na ki nongshong shnong ba don 29,66, 889 ngut kiba la leh ia ka NPR kiba iatip paidbah kum u Aadhar number ha kane ka jylla.
Kat kum ka khubor sorkar, haba khein kyllum ne percentage ka jingdon jong ki briew ba la buh kyrteng NPR ka long 2.89 percent.
Kiba leh ia ka Biometric Enrolment ki don 1,12,885 ngut kynthup ki briew kiba trei ha ki kam shipai, bad haba khein kyllum ki don 3.8 percent ha baroh kawei ka jylla.
Ka khubor sorkar ka la ong ba kane ka jingpynrung kyrteng Biometric Enrolment ka la sdang ha kylleng ki district ka jylla lait noh tang ka North Garo Hills, South Garo Hills, South  West Khasi Hills, bad ka East Jaintia Hills district ki bym pat sdang ban leh ia kane.
Ka sorkar ka la thmu ban pyntreikam ia kane ka jingpynrung kyrteng ha man ki Block bad ki jaka sor jong ka jylla ia baroh ki nongshong shnong lyngba ka jingpeit jong ka ophis u Deputy Commissioner.
Na ka liang u nongthoh khubor, u la ioh jingtip ba ka jingpynrung kyrteng ka la iaid mynta shaid shaid sha ki jaka nongkyndong kum sha ka thain Pynursla Block ha kaba jan baroh ki shnong ki la leh ia kane bad don katto katne kiba dang sngew artatien. La iathuh ba ka jingpynrung kyrteng ia ki paidbah ha ka man ki shnong ha Pynursla Block ka la iaid shaid ha kine ki sngi.
Lah ban kdew ba ka KSU kham mynshwa, ka la pyrshah jur ia kane ka jingpynrung kyrteng ka sorkar ia ki briew ha ka NPR khlem pat da pynlong shwa ia ka jingpynshisha ia ki nongshnong shnong ha ka jylla ban tip ia ki briew kiba dei hok ki nongshong shnong bad ki bym dei hok namar ba lada shu leh lymmuh, ka jingeh ka long ba ki briew kiba shu wan nabar kin ioh rung kyrteng pynban kum ki nongshong shnong ka jylla.