Na ka Um Acid, phah tuklar ka KHNAM, ha u myntri

Shillong, 21’lyngkot:
Ka Khun Hynniew trep National Awakening Movement State Youth Wing, ka la thoh sha u myntri ka koit ka khiah u bah AL Hek halor ka jinglap jong ka ba ka um dih kaba sam sha ki paidbah na ka jaka sam um na Mawphlang ka long ka bym bit ban dih bad ruh ba ka dei kaba don Acid. Ha katei ka jingthoh ka KHNAM ka la pyntip sha u myntri ba ha ka 6 tarik u Kyllalyngkot ka la tong ia ka um na GSWS 4 ½ Mile Upper Shillong bad ia katei ka um ka la phah test sha Pasture Institute Lawmali, Shillong.
Ka la pyntip ruh ba ka ripod ba ka la ioh ka long ba katei ka um ka long kaba don Acid bad ka PH Value kaba 5.7, ka MPN jong ka Coliform ha ka 100ml jong ka um ka long 5. Ka la pyntip ruh ba ha katei ka ripod la buh ia ka jingkynthoh ba ka um ka dei kaba don khniang jingpang bad ka long ka bymbit ban dih.
Shuh shuh ka KHNAM ka la ong ba ka la ioh jingtip lyngba ka ain jingtip paidbah, ba ka GSWS Mawphlang kam don Chemist ne Microbiologist,bad katei la ong ba kan ktah ia u paidbah uba pyndonkam ban dih ia katei ka um.
Ka la ong ba ka tnad PHE ka la duh jingshaniah na u paidbah bad kumta ka la ai jingmut ia u myntri ba un thaw ia ka komiti tohkit ia ka jinglong ka um ka ban sam sha kipaidbah nangtei na Mawphlang, ba ka tnad ka koit ka khiah kan test ia ka umla kumno kumno shisien lane arsien ha ka shibnai.
Ka KHNAM ka la ong ruh ba ka tnad PHE ka la kam ba ka ju test ia ka um ha manla u bnai bad ka la ai jingmut ba kan kham bha ia ka tnad PHE ba kan sei paidbah lyngba ki kot khubor ia ka ripod kaba mih na katei ka jingtest jong ka ia ka um. Ka la kyrpad ia u myntri ka koit ka khiah ba un tuklar ma u ia katei ka kam khnang ba u paidbah uba pyndonkam ia katei ka um un ym shah ktah.