Shillong: Ka East Jaintia Hills District Football Association (EJHDFA) ka synjuk kaba pyniaid iaki jingialehkai phutbol ha East jaintia Hills District kala iathuh ba iaka Super League 2019, yn bei pisa da u myntri bah Kyrmen Shylla bad ia kane un synniang na ka tulop jong u.
Ha kane ka sngi Saitjain, ka sngi ban pyni pyrthei ia ka khusnam bad ruh ka jingsdang ka jingialehkai ba nyngkong, u bah Kyrmen Shylla haka jingkren plie ia kane ka EJ-Super League 2019.
U bah Kyrmen u la ban ia kiwei ruh ki rangbah ka thain ban mih sha khmat naka bynta ban bei pisa ia kino kino ki synjuk kiba ieng ban pynkiew ia ki jingialehkai hapoh ka East Jaintia hills District. U la ai jingmut ruh iaki samla ka district naka bynta ban iai pynleit jingmut haki kam ialehkai bad ruh ban long kiba lait na kino kino ki jingdih basniew bad kum ki samla ka District ki dei ban long kiba don ka jingkitkhlieh naka bynta ka ing ka sem, ka shnong ka thaw bad iaka district hi baroh kawei.
Ha kane ka sngi la ioh ban sakhi iaka jingialehkai ba nyngkong ka ‘ EJ-Super League 2019 Shri. Kyrmen Shylla Contribution ‘ hapdeng ka Thangskai tiger Sc pyrshah iaka Khliehriat west YWSC , ha kaba ka result ka long 1-0 .
Baroh ki don 7tylli ki kynhun ha ka Super Division kiban knieh iaka nam lahduh bad ban mih khmat iaka District shaka Meghalaya State League jong ka MFA.
Ha kane ka sngi, ka EJHDFA ka la pyllait ruh iaka Baby League Champion Trophy. Hynriew tylli ki kynhun kin iashim bynta ha kane ka Baby League, kiba kynthup 1.Rymbai tigers 2.Wapung King Cobra, 3.Cee’s Academy Eagles, 4. Khliehriat Ambrose hills Myna, 5.Sutnga grassroots thunderwolves bad ka 6.Golden Lions.
Ha ka jingplie iaka Baby League u kongsan bah Kyrmen Shylla, u la pynpaw ka jingsngewnguh iaka synjuk naka bynta ka jingshim khia iaka jingpynkyntiew iaka jingialehkai haki khynnah. U la rai ruh naka bynta ban iarap ai sopti uniphom iaki kynhun ba iashim bynta.
Ia kane ka Baby League ka EJHDFA la pynlong daka jingiatreilang bad ka MFA bad ruh ka Sorkar Meghalaya.
Ha kane ka Sngi nalor ki nongkitkam bad dkhot ka EJHDFA, la iadonlang ruh ki nongmihkmat naki club ba iashim bynta, ki rangbah, ki trai ki kynhun bad ki khynnah Baby league.
La iadonlang ruh Principal ka Jaintia Eastern College, u bah P. Nongtdu, ki rangbah shnong naki shnong ba marjan bad ruh ki longkmie kiba juh ieit bad pynshlur bha iaki ki kam jingialehkai.
Phi don ban ong eiei?