Shillong:Ki nongtrei jong ka Garo Hills Autonomous District Council (GHADC) myn hynnin ka sngi palei, ki la pynlong ia ka jingsangeh trei kam kaba khlem buh por ban dawa ban siew noh ia ka tulop kaba la sah mynta la palat 30 bnai bad ban weng noh mardor ia ka Secretary ka Executive ka Rise R Marak.
Haba ia kren bad ki lad pathai khubor, na ka liang u nongialam jong ki nongtrei hapoh jong ka GHADC u Mark Flaming, u la iathuh ba kane ka jingshim ia ka rai ban pynlong ia ka jingiakhih kaba khlem buh por ka la sdang naduh mynta ka sngi bad kan bteng haduh ba kin da ioh ia kane ka jingdawa jong ki.
Na ka liang jong ki nongtrei ka GHADC, ki la dep ban ujor sha u Lat ka jylla bad kumjuh sha ka ophis jong u myntri rangbah duh jong ka Ri India bad sha kiwei kiwei, halor ka jingtyrwa ban siew shibnai ka tulop bad la ong ruh ba kane kan ym lah ban iarap ia ki ban siew ia ka ram kaba ki la shim.
Ka GHADC ka don haduh 1700 ngut ki nongtrei bad la ong ba ka jingmih tang na ka lad mih pisa kaba dei na ka GHADC ka long kumba T.7 klur ha ka shibnai katba ka jingsiew tulop na ka bynta ki nongtrei ha ka jingsiew kaba rim ka long tang T.3.5 klur lada shim ha ka tulop kaba thymmai kaba la pyntrei kam naduh u bnai Iaiong 2018 ha ka shibnai ka long T.5 klur.
U la iathuh ba ka jingduh tulop jong ki nongtrei ka GHADC ka la dei naduh ka Executive Committee kaba la ialam da ka seng Congress ha ka por jong ki san bnai bad ha ka Executive Committee kaba la ialam da ka NPP ka long 27 bnai bad ki nongtrei ka GHADC ki dawa ba ki dei ban ioh noh ia ka tulop ka jong ki.
Katba na ka liang u Administrator jong ka GHADC, u Dr Vijay Kumar u la kyntu ia ki nongtrei ba kin wan trei khnang ba kan ym ktah ka jingtrei kam bad ha ka ba ia dei bad ka tulop, yn sa pyrshang ban leh katba lah.
Phi don ban ong eiei?