Na ka T.80 klur tang 90 lak, ka iarap ia ki nongbylla

Shillong, 6 lyngkot:
U Myntri khynnah ka tnad bylla ka sorkar pdeng, u Bandaru Dattatreya u la thalain ia kane ka sorkar jylla ba ialam kaCongress, ha kaba u la ong ba kam shym la pyntreikam ia ka pisa ban ai sha ki nongbylla kaba 80 klur.
Haba kren mynta ka sngi ha Shillong, u Bandaru Dattatreya u la ong ba ka sorkar jylla ka la lum pisa haduh T. 80 klur ban ai ia ka jingiarap ia ki nongbylla, hynrei na kane, ka pyndonkam tang T. 90 lak.
“Ka sorkar jylla ka la lum ia ka khajna nongbylla (cess)T. 80.42 klur hynrei kam shym la pyndonkam satia bad ka pyndonkam tang T. 90 lak”, la ong u Bandaru Dattatreya bad ia kane, la pynpaw ha ka jingialang ka kaba long hynnin ka sngi.
U la bthah ia ka sorkar jylla ba baroh ka pisa kaba ka sorkar ka la iohlum naka bynta ban ai ia ki jingdonkam ia ki nongbylla, ka dei ban pyndonkam hok, bad ym dei ban pyndonkam bakla da kumwei pat.
Kane ka pisa kaba ka sorkar jylla ka la iohlum, ka long ban ai sha ki nongbylla ha ka rukom ka bai shah sumar, bai skul khun, ka baibam bad kiwei ki jingdonkam.
U la bthah ruh ia ka sorkar jylla ba ka dei ban bthah ia ki kompeni, kontraktor ban siew ia bai bylla ki nongtrei bylla ha bank account jongki, ym ban shu ai pisa ka kti. U la ong ba ka jingthmu ban siew ia ka pisa ha bank account jongki, ka long ban pynlait ia ki nongbylla na ka jingshah ban bein ha ki malik, namar ka lah ban jia ba ha ka jingthoh ki ong ba ai 8 hajar katba ha kti pat ki ai tang 6 hajar.