Na ka T.74.65klur, pynlip ding ka MeECL, haduh 7 kynta shi sngi

Shillong:Ka MeECL, ka dei ban siew T.74.65 klur sha ka PGCIL, na bynta ka jingsam ding jongka bad ia mynta ka MeECL, kam don pisa satia ban siew ia katei ka pisa, namar ba ka don ka jingduna pisa kaba jur jong ka corporation.

“Ngi lah ban siew tang ia ka tulop jong ki nongtrei jongngi. Dang shen, ngi la kyrpad ia ka sorkar Jylla, ba kan bei pisa T.113.47klur, ba ngin siew ia katei ka pisa kaba sah jong ka PGCIL bad ban ioh biang ia ka letters of credit bad ki kompeni sam bor ding jong ka sorkar India. Ka jing iakren, ka dang iaid, ha ka kyrdan kaba halor duh jong ka sorkar Jylla” ong ka khubor.

Namar ba ym lah satia ban siew pisa, kumta ka PGCIL, ka la pynmih ia ka kyndon jongka, ha kaba ka la shah ban pyniaid bor ding, kaba tang 70MW. Haduh shiteng miet, ka jingiakren, ka dang iaid, na ka bynta ba kan buhteng, shwa ia katei ka kyndon jongka, na ka bynta shi taiew, hynrei ka PGCIL, ka kwah ban pynthikna, na ka bynta ka jingsiew kaba mar shiteng ha kane hi ka taiew bad ban don ka jing ia kut por, kaba shai, sa ia ka shiteng kaba sah.

Namar ba ym don lad shuh, da kumwei pat, kumta ka MeECL, ka la rai ban pynlip ding kaba sdang naduh ka shiteng miet jong ka 14tarik Rymphang 2021, ha baroh kawei ka Jylla, ha ka rukom pynbeit por, kaba lah ban iapher, na kawei ka jaka sha kawei pat.

Ka jing pynlip ding ha Shillong bad East Khasi hills, ka long ha ka por 12baje shiteng miet, haduh 3 baje mynstep, Garo Hills naduh 3 baje haduh 6 baje mynstep, Jaintia Hills bad Ribhoi District naduh 6 haduh 9baje mynstep, Shillong bad East Khasi Hills, naduh 9 baje haduh 12baje shiteng sngi, Garo Hills naduh 12 baje haduh 3 baje nohsngi, Jaintia Hills bad Ribhoi District naduh 3 haduh 6 baje nohsngi, Shillong bad East Khasi hills naduh 7 haduh 8 baje mynmiet bad Garo hills naduh 8 haduh 9baje mynmiet, Jaintia Hills bad Ribhoi naduh 9baje haduh 12baje shiteng miet. Haba khein lang, ka jing pynlip ding, ka ktah haduh hynniew kynta ha ka shisngi, ha kawei kawei ka jaka ba shah ktah.