Na ka T. 72 pan u nongtrei ka MUDA T.2000 ban ai OC

Shillong, 11 Risaw:   Uwei u nongtrei ka Meghalaya Urban development Authority (MU DA) la kynnoh ba u la shim pisa haduh T. 2000 (ar hajar tyngka) ban ai Occupancy Cerificate (OC) ia kawei ka iing ba la shna ha Mawlai Mawiong wat ha ka jingshisha ka dor ka long tang T. 72 (hynniew phew ar tyngka).
U Bah C Rani haba iakren bad u nongthoh khubor mynta ka sngi u la ong ba u nongtrei ka MUDA uba la tip kyrteng kum u Wansted Syiemlieh u la dain dor T. 2000 kum ka bai dro ia ka iing jongu khnang ba ka MUDA kan ai ia ka OC kaba u la aplai ban ring bording ban ring um ha iing jongu ha Mawiong.
“Ngi la pan OC na ka MUDA ia ka iing ba la shna hynrei une u Wansted Syiemlieh u la pan kata ka bai dro kaba T. 2000 haba u wan peit ia ka iing ha ka 21 tarik ”Hynrei katto katne sngi, uwei pat u ophisar u la phun sha ki ba ka jingdro kam long kaba shai bad u la wan peit biang ia ka iing bad ynda la wan ma u, u la ong ba ka dor ka long tang T.72 (hynniew phew  ar tyngka)”,  la ong u Bah Rani.
U Bah Rani u la ong ba une u ophisar ka MUDA u la bthah ia u ba un pan biang noh ia ka pisa kaba u la ai ha utei u Wansted Syiemlieh haduh T. 2000 namar ba kam dei ka dor haduh katei.
“Ngi la leit pan biang noh ia ka pisa na une u Wansted Syiemlieh hynrei um ai bad u shu ong un sa ai bad un sa ai katba leit pan na u”, la ong u Bah Rani.
Ban pynthikna ba un ai noh ia katei kaba u la shim beain, u Wansted Syiemlieh u la thoh noh ha ka kot sada da kaba u la kular ba un pynphai noh ia katei ka pisa. Ha ka jingthoh ba la ioh ia ka kopi ba la soi da u Wansted Syiemlieh u la kular ba un ai noh ia ka pisa hynne ka sngi ka 9 tarik Risaw, 2015 hynrei haba u Bah Rani u leit sha ophis ka MUDA um shym la don satia.
Ka jingthoh jong u Wansted Syiemlieh ka ong kumne, “Nga u Bah Wansted Syiemlieh ba trei hapoh ka MUDA ba dei peit sha Mawiong na ka bynta ban leit inspect ia ki iing nga la shim ia ka pisa bai drawing na I Kong L Shabong Rs. 2000/- tyngka, bad ia kane ka drawing ym donkam shuh ban draw namar ka dei ka iing kaba rit ba shu tap shiliang.
Te nga la kular ban pynphai noh ia ka pisa jong I ha ka 9th October, 2015 hapoh ophis ka MUDA. Lada ngam lah ban pynphai phi lah ban ai sha ki bor jong ka ain”.  Ha kane ka jingthoh u Wansted Syiemlieh u la soi artad ia kane ka jingthoh bad ka Kong L Shabong kaba dei ka lok jong u Bah C Rani ha ka 5 tarik Risaw, 2015.
“Kumba la la iakut ngi la leit ban pan noh ia ka pisa mynta ka sngi hynrei u khlem don satia ha ophis, u la thok ia ngi”, la ong u bah Rani bad u la bynrap, ba u lah ban leit ujor noh sha ki pulit ia kane ka jingleh thok jongu.