Na ka siat mrad, sha ka siat briew

Shillong,8 Jymmang:
Ka jingjia ba sngew sih kthang bad ka bym shym la poi pyrkhat ka la wan jia ha ka longing longsem jong u samla Kiarling Massar u ba shong ba sah ha ka dong Lad, ha Nongshken, ha kaba utei u samla u la kyllon iap hashen namar u paralok jong u uba la kum bakla siat ia u da ka suloi. Katei ka jingjia ka la jia ha ka 6 tarik mynta u bnai.
Katei ka jingjia ka la jia ha ka por ba kitei ki shi paralok ki dang don ha Bri jong ki kaba ju khot ka Singklam, kaba don hajan khappud bad ka Bangladesh bad lada hiar da ka kjat na Nongshken sha katei ka Bri ka bam kumba shiteng kynta eiei, ong ka tyllong khubor , La iathuh ba ha bri ki la ia sah haduh kumba hynriew-hynniew ngut, bad katei ka jingbthei suloi ka la jia por 10-11 baje mynmiet jong ka sngi ba-ar.
Ha kawei pat ka khubor ba la ioh lum na ki pulit, la iathuh ba katei ka jingjia ka la jia ha ka por 8 baje jong ka miet 6 tarik , katba bah Pyrshang Iawram u dang leit siat mrad, hynrei u la kum siat bakla ia la u paralok. Ki pulit ki la kem ia u bah Pyrshang Iawram.