Na ka shongjngai bad ka tap mask, mynta sa ka tem bom bad khang iing ha Delhi

Hadien ka jing ia shong jngai bad ka jing ia tap ha Delhi, mynta ka la wan sa ka por khang sbak ia ki jingkhang iing bad ki jing khang iit bad ka daw, ka long namar ba ka la poi sa ka por ba wan ki wan hiar thma ki puit ha katei ka Jylla. Ki magistrate, kiba ju bunkam ban peit mynshwa ia ki riew pynkhein ain, hynrei mynta, ki la ia bunkam ban peit sa ia ki puit bad kata ka long ban thaw ia ki lad ki lynti ban pyniap ia kitei ki puit kiba rung sha ki iing ki sem, sha ki lyngkha ki risai jong ki briew.

Ka sorkar Delhi, ka la bthah ia baroh ki nongshong shnong, ba kin khang bha sbak ia ki jingkhang bah bad ki jingkhang iit jongki bad ia ki jingthung jingtep ruh, ba kin sop bha da ki plastik.

U AP Saini, Joint Director ka tnat rep, u iathuh ba la bthah ia ki magistrate, ba kin ia treilang bad ki paidbah, ban sdang sa ia ka jing ia pyniap ia kitei ki pulit bad kawei na ki lad ban pyniap ne pynher krad ia kitei ki puit, ka long ba pynrwai sawa jam bha da ki jingrwai, lane ban tem sawa bha ia ki bom, ki ksing, lane tem ia ki khiew ki siang, ki pela ki shamoit, lane thang da ki bom pataka bad kiwei ki lad jing pynsawa.

Ha ki bnai ba ladep, ka la don ka hiar thma bad pynjulor kitei ki pulit ha ki jylla jong ka Rajasthan, Gujarat, Maharashtra bad Madhya Pradesh.

Haduh mynta ka sngi, kitei ki puit ki ia lum lymbung ha Gurugram bad bad ki la sdang ban hiar thma bad sop spain ha ki iing ki sem bad ki jaka rep bad ki jaka ri jingri ha South Delhi. Nangta la iathuh ba ki la nang tur shuh shuh sa sha Asola Bhatti, kaba don hi ha South Delhi.

U myntri ka tnat peit mariang jong ka Delhi, U Gopal Rai, u iathuh ba mynta ka donkam ban tem ia ki jingtem kiba pynshong shit bad kiba sawa jur bha bad ula bthah ruh ia ki briew jong ka tnat peit mariang, ba kin leit sha ki jaka rep ban iohi dalade ia ki jingduh jing julor.

Ki stad ki iathuh ba ha ka jaka, kaba shi square kilometre, ki ju ia lum haduh 40 million tylli kitei ki puit bad ki lah ban bam ia ki jingbam, kiba lada bam ki briew, kin kynthup ia 35 hajar ngut ha ka shisngi.