|
Shillong: Ka HYC Nongthliew Circle hapoh ka jingialam u samla Joplang Kharnaior, President, ka la leit rah da ka jingthoh mynta ka sngi, ha u Sub Divisional Officer, MeECL Sohiong ha kaba ia dei bad jingshongdum la arbnai hapoh katei ka shnong Laitarted, Nongrang. Ka jingduh ding, la arbnai ka la wan rah jingeh kaba khraw ia u paitbah bad kham tam eh ia ki khynnah skul kiba dang don hapoh ka eksamin kaba shiteng samoi. Ha ka jingthoh ka seng, ka la kyrpad na u tei u ophisar, ba dei ban pynbiang ding noh hapoh ka shi taiew khnang ba kan nym ktah na ka bynta kitei ki khynnah skul kiba dang pynkhreh ia ka exam ka jongki bad na ka liang u tei u officer u la kular ban leh katba lah ban pynbiang. Hapdeng ka jing ia kren bad u tei u ophisar, u la pynpaw ka jingslem ban pyndait da ka machine thymmai, ha katei ka shnong dei na ka daw ki 14tylli ki longiing bym siew ia ka bill light, wat la ka machine ba thymmai ka la don hapoh ophis, la ar taiew tam bad u la pynpaw ba ka don kawei ka longiing ka la poi da ki lak ka bai thang ding bad 13 iing kiwei pat ki khlem ia siew. Ha kaba ia dei bad katei ka ram kaba la poi lak, ka seng ka pynrem jur ia ka ophis, namar ka jingpoi haduh kattei ka pisa ka pyni ba ka ophis, kam shem la shim ia ka jingkit khlieh bad ka la shu ieh khlem disconnect ha ki por ba biang, wat la ki khlem siew ia ka bill light da ki bun bnai. La ong shuh ba ka jingdap lak, ka la buh jingeh ia u nongsiew, namar dei ka longiing baduk bad im ha ka bylla sngi. Khatduh ia wai ka seng ka kyntu ia u tei u ophisar, ba ka jingsahram ha ki katto katne ki longiing kam dei ban long ka daw ia u ba bun balang, namar 90% ki longiing, na katei ka shnong ki siew ia ka bill kaba manla u bnai.
|
Phi don ban ong eiei?